ने. सं. ११४६ अनलागा षष्ठी -

हिमाल सरसफाई अभियान–२०२३ या निंतिं कोकाकोला मू दाता

येँ (नेपालभाषा टाइम्स)- नेपाली सेनाया नेतृत्व ‘हिमाल बचे यायेगु कुतः’ धयागु नारा बियाः जुयाच्वंगु हिमाल सरसफाइ अभियानय् कोकाकोला फाउन्डेसनं थुगुसी नं ग्वाहालि याःगु दु । कोकाकोला फाउन्डेसनं थ्व अभियानय् मू दाता कथं ग्वाहालि याःगु खँ धाःगु दु ।

थ्व अभियानयात विश्वया हे आःतकया दकलय् तःधंगु हिमाल सरसफाइ अभियान धयातःगु दु । थ्व अभियानया झ्वलय् सगरमाथा, ल्होत्से, अन्नपूर्ण व बरुण हिमाल यानाः ८००० मिटर स्वयां तजागु हिमालय् सरसफाइ ज्याझ्वः न्ह्याकी । वंगु चैत १४ निसें न्ह्याःगु थ्व अभियान जेठ २२ तक संचालन जुइसा थ्व झ्वलय् हिमालं ३५ टन फोहर संकलन यायेगु लक्ष्य तयातःगु दु ।

नेपाली सेनाया नेतृत्वय् न्ह्यानाच्वंगु थ्व अभियानय् मेमेगु गैरनाफामूलक संस्थात, व्यावसायिक पुचः, नागरिक समाज लिसें रिसाइकलिङ पार्टनरतय्सं मंकाः कथं ज्या यानाच्वंगु दु ।