छन्हु निन्हुं फैसला वइगु प्रमं गय् सिल ?

येँ- प्रधानमन्त्री केपी ओलीं आः छन्हु निन्हुया दुने हे सर्वोच्च अदालतं संसद विघटन सम्बन्धी मुद्दाया फैसला बी फइगु खँ धयादीगु दु । म्हिगः कञ्चनपुरय् औद्योगिक क्षेत्रया शिलान्यास यासें वय्कलं उगु खँ धयादीगु दु । वय्कलं सर्वोच्च अदालतया निर्णय छन्हु निन्हु लिपा वइ धयादीगु खँयात थुखे न्यायिक ख्यलं धाःसा अर्थपूर्ण रुपं काःगु दु । सर्वोच्चं फागुन १० गते दुने संसद विघटनया मुद्दाय् बहस याःपिं अधिवक्तातय्त बहस नोट बीत निर्देशन बिउगु खः । उकिं आः याकनं निर्णय वयेफइगु सम्भावना दुसां ‘छन्हु निन्हुया दुने’ वइगु सम्भावना धाःसा मदुगु खँ संविधानविद् डा. पूर्णमान शाक्यं धयादीगु दु ।

‘नेपालभाषा टाइम्स’ लिसे खँ ल्हासें डा. शाक्यं अधिवक्तातय्सं बिउगु नोट स्वयेत छन्हु निन्हु काइगु व वयां लिपा फैसला च्वयेत छन्हु निन्हु काःसां नं फैसलाया सार जक वये फइगु खँ नं धयादीगु दु । न्हापा प्रधानन्यायाधीश विश्वनाथ उपाध्यायया पालय् नं फैसलाया सार जक बिउगु खःसा पूर्ण पाठ लिपा जक बिउगु खः । वय्कःया कथं अदालतय् संसद विघटनया मुद्दा स्वःपिं संवैधानिक अदालतया न्याम्ह न्यायाधीशतय्सं आः मेगु छुं हे बेञ्चया मुद्दा मस्वसे थुकी हे जक ज्या यानाः फैसला बीगु तयारी यानाच्वंगु दु ।

सम्बन्धित बुखँ

LEAVE YOUR COMMENTS