युएई योमरि पुन्हि न्यायेकल
नेवाःतय् महत्वपूर्ण नखः योमरि पुन्हि युएई नं न्यायेकूगु दु । थन च्वनाच्वंपिं नेवाःतय्सं थःपिनि संस्कृति, परम्परा विदेशय् च्वनाः नं संरक्षण यायेगु ताः तयाः वंगु १३ डिसेम्बर कुन्हु दुबईया अल शफा पार्कय् उपस्थित जुयाः गुँभ्वय् न्यायेकूसें यःमरि पुन्हि न्यायेकूगु खः । नेवाः पुचः युएई दुबई क्षेत्रीय समितिया ग्वसालय् जूगु थ्व ज्याझ्वःदुबई क्षेत्रीय समितिया अध्यक्ष दिपेश श्रेष्ठया संयोजकत्वय् जूगु खः । ज्याझ्वः सफल यायेगु निंतिं नेवाः पुचः युएईया थीथी पदाधिकारीसहितया संयन्त्र गठन याःगु खः ।
ज्याझ्वःया सुरुइ सकलें पाहाँपिंत ब्याच व योमरि प्रसाद बियाः लसकुस याःगु खः । पाहाँ कथं नेफिन युएईया अध्यक्ष महेश मोक्तान, नेपाली समाज युएईया कोषाध्यक्ष दिपक राउत, एनआरएनए मध्यपूर्व उपसउंयोजक मनोज गोर्खाली, प्रवासी भुजेल समाज सेवा समितिया खडक भुजेल, नेफिन सदस्य व तमु समाजया प्रतिनिधि साङ्ली डोल्मा गुरुङ, नागरिक सेवा समाजया अध्यक्ष प्रभाकर पौडेल, युएई एक्सचेञ्ज नेपाल कोअर्डिनेटर सन्तोष प्रसाईया उपस्थिति दुगु खः ।
ज्याझ्वःया निंतिं नेवाः पुचः युएईया अध्यक्ष लक्ष्मण श्रेष्ठं मनोरञ्जनात्मक ज्याझ्वःया जिम्मा कयादीगु खःसा उपाध्यक्ष राजेश प्रधान, खेलकूद संयोजक हिरालाल श्रेष्ठं यातायात व्यवस्थापनया जिम्मेवारी कयादीगु खः । अथेहे नसाज्वलंया व्यवस्थापन महासचिव कुमार बलामीपाखें जूगु खः ।
यःमरि दयेकेगु ज्या दुबई क्षेत्रीय समितिया अध्यक्ष दिपेश श्रेष्ठया छेँय् निरु श्रेष्ठ, रीदि स्थापित श्रेष्ठ नविना शाक्य, सृष्टि शाक्य, सपना मालाकारलिसें लक्ष्मण श्रेष्ठ, हिरालाल श्रेष्ठ, प्रमोद श्रेष्ठ, राजेश प्रधान, दिपेश श्रेष्ठपिंसं यानादीगु खः । विदेशय् च्वनाच्वंपिं नेवाःतय्त थःगु संस्कृति संरक्षण यायेत प्रोत्साहित यायेगु, थीथी प्रतिभावान नेपालीतय् प्रतिभायात कदर यासें हःपाः बीगु व नेवाः कला, संस्कृतियात संरक्षण व प्रवद्र्धन यायेत नेवाः पुचः युएई थज्याःगु कथंया ज्याझ्वः ग्वसाः ग्वया वयाच्वंगु व थुकियात निरन्तरता बियाः यंकेगु निंतिं नेवाः पुचः युएइ न्ह्याबलें लगे जुयाच्वनीगु खँ महासचिव कुमार बलामीं कनादीगु दु ।
LEAVE YOUR COMMENTS