भारतय् धार्मिक स्वतन्त्रता हननया घटना अप्वल, हाकूगु धलखय् तयेत माग

येँ – भारतय् धार्मिक स्वतन्त्रता हननया घटना अप्वःगु धासें छगू अमेरिकी आयोगं भारयात हाकूगु धलखय् तयेत माग याःगु दु ।

अन्तर्राष्ट्रिय धार्मिक स्वतन्त्रताया निंतिं नीस्वनातःगु अमेरिकी सरकारया आयोगं (युइससीआईआरएफ) भरतीय प्रधानमन्त्री नरेन्द्र मोदीया इलय् न्हू दिल्लीं धार्मिक स्वतन्त्रताया हनन याःगु खँ धाःगु दु । मंगलवाः थःगु वार्षिक प्रतिवेदन सार्वजनिक यासें भारतं थज्याःगु अवस्थाय् सुधार मयासाः हाकूगु धलखय् तयाः प्रतिबन्ध तकं तयेमाःगु सुझाव बिउगु दु ।

सन् २०१९स भारतया अल्पसंख्यकतय्सं धार्मिक रुपं तच्वःगु दमनया अवस्था फयेमाःगु व मुक्कं भारतय् धार्मिक स्वतन्त्रताया अवस्था दयनीय जूगु खँ प्रतिवेदनय् न्ह्यःथनातःगु दु । अथेहे भारतीय प्रधानमन्त्री मोदीया अति हिन्दुवादी सरकारं अल्पसंख्यकत प्रति हिसांया वातावरण दयेकूगु व असहिष्णुता ब्वलंकीगु कथंया अवस्था सृजना याःगु धाःगु दु ।

आयोगया उप सभापति नादिनी मानेजां भारत सरकारं हःगु नागरिकता विधयेकया नापं अल्पसंख्यकतय् अधिकारयात कुण्ठित यायेगु ज्या तसकं चिन्तजनक जूगु धयादिल ।