नसाज्वलं विश्व व्यापीकरण अभियान शुरु
नेपाःया नसाज्वलंयात अन्तर्राष्ट्रिय बजारय् स्थापित यायेगु ल्याखं ‘नेपाली नसाज्वलंया विश्वव्यापीकरण अभियान’या औपचारिक शुरुवात जूगु दु । नेपाःया स्थानीय नसाज्वलंयात अन्तर्राष्ट्रिय बजारय् स्थापित याना यंकेगु ल्याखं थ्व अभियान न्ह्याकूगु खः । अभियानया औपचारिक शुरुवातलिसें थुगु अभियान अन्तर्गत तयार यानातःगु नेपाली नसाज्वलं दयेकेगु ज्ञान बीगु ‘कुक बुक व भिडियो’ नं सार्वजनिक याःगु खः ।
होटल एशोसियसन अफ नेपाल (हान) व नेपाल पर्यटन बोर्डया ग्वसालय् जूगु ज्याझ्वलय् संस्कृति, पर्यटन तथा नागरिक उड्डयन मन्त्री रवीन्द्र अधिकारीं प्रचार सामग्री सार्वजनिक यासें नेपाः वइपिं विदेशी पर्यटकयात थनया मौलिक नसाज्वलंया सवाः बी फत धाःसा उकिया माध्यमं अझ अप्वः पर्यटक दुकाये फइगु विश्वास प्वंकादिल ।
विदेशी कूटनीतिक नियोग व गैरआवासीय नेपाली संघमार्पmत नं नेपाली नसाज्वलंयात प्रवद्र्धन याये फइगु वय्कःया धापू दु । मन्त्री अधिकारीं बुद्ध परिवथ व रामायण परिपथया प्रवद्र्धनया निंतिं हवाई सेवा विस्तार यायेमाःगु खँ न्ह्यथँसें भारतीय प्रधानमन्त्री नरेन्द्र मोदीया न्ह्यःने वयाच्वंगु नेपाः भ्रमण लिपा थुकी अझ ठोस निर्णय जुइगु जानकारी बियादिल ।
वय्कलं निदँया दुने पर्यटकीय पूर्वाधारया क्षेत्रय् देशं तःधंगु हिउपाः काये फइगु विश्वास यासें निजी ख्यःलिसे साझेदारी मजुइकं पर्यटनया विकास असम्भव जूगुलिं सरकार निजी ख्यःलिसे सहकार्य यायेत तयार दु धयादिल ।
देय्न्यंकंया थीथी थासं संकलन याःगु झण्डै निसःताजि स्वयां अप्वः प्रकारया नसाज्वलं दयेकेगु विधि, नसाज्वलं दयेकेत आवश्यक सामग्रीयात विशेषज्ञ सेफतय् पुचलं विस्तृत अध्ययन यानाः विश्वव्यापी रुपय् सामग्रीया उपलब्धत, सवाः आदिया आधारय् झण्डै ३० गू प्रकारया उपयुक्त नेपाली रैथाने नसाज्वलंयात विश्व बजारय् प्रवद्र्धन यायेगु ल्याखं कुक बुक व भिडियो तयार याःगु खः ।
नेपाली नसाज्वलंयात अन्तर्राष्ट्रिय बजारय् प्रवद्र्धन यायेगु निंतिं छनोटय् लाःगु नसाज्वलंयात नेपाल सरकारया केन्द्रीय खाद्य अनुसन्धानशालां परीक्षण यानाः प्रोटिन व न्यूट्रिसन आदिया प्रमाणित पत्र प्राप्त याःगु खः।
वरिष्ठ पर्यटनविद् कर्ण शाक्यं नेपाली नसाज्वलंया माध्यमं नेपाःयात अन्तर्राष्ट्रिय जगतय् तक थ्यंके फइगु जूगुलिं विदेशय् च्वंगु नेपाली कूटनीतिक नियोगतय्सं ग्वसाः ग्वइगु भ्वजय् नेपाली नसाज्वलं दुथ्याकेमाःगु, देय्या नां चले जूगु व पाँचतारे होटलय् अनिवार्य नेपाली रेस्टुरेन्ट नापं तीन तारे व चार तारे होटलय् नं नेपाली नसाज्वलंया मेनु तयेगु व्यवस्था मिले यायेत सरकारयात इनाप यानादिल ।
होटल संघ नेपाल(हान)या नायः अमरमान शाक्यं विश्व पर्यटन बजारय् नसाज्वलंपाखें पर्यटनया विकास द्रुत गतिं जुयाच्वंगु सन्दर्भय् नेपालय् विद्यमान नसाज्वलंया समृद्धि, रीतिरिवाज व संस्कृतिपाखें नेपाःया पर्यटन बजारंतकं आपालं लबः काये फइगु जूगुलिं नेपाःया रैथाने नसाज्वलंयात विश्वव्यापीकरण यायेगु अभियान न्ह्याकागु स्पष्ट यानादिल ।
उगु इलय् नेपाल पर्यटन बोर्डया प्रमुख कार्यकारी अधिकृत दीपकराज जोशीं नं नेपाःया नसाज्वलंयात विश्व जगतय् थ्यंकेमाःगु आवश्यक जूगु खँय् बः बियादीगु खः ।
LEAVE YOUR COMMENTS