थिमिया स्कुलय् स्थानीय पाठ््यक्रम
थिमि – मध्यपुर थिमि नगरपालिकां थ्व हे शैक्षिक सत्रनिसें स्थानीय पाठ्यक्रम लागू याइगु जूगु दु । मध्यपुर थिमि नगरपालिकां स्थानीय पाठ््यक्रम लागू यायेगु निंतिं गठन यानातःगु समितिं वंगु जेठ ९ गते प्राथमिक तहनिसें खुगू तगितकया निंतिं न्हूगु शिक्षण प्रणाली पेश यायेधुंकूगु दु ।
देय्या संविधानय् स्थानीय सरकारं स्थानीय पाठ््यक्रम लागू याये दइगु व्यवस्था यानातःगु दु । थ्व हे व्यवस्थाकथं मध्यपुर थिमि नगरपालिकां स्थानीय पाठ््यक्रमया निंतिं वरिष्ठ शिक्षाविद् प्रा. रामकृष्ण दुवालया संयोजकत्वय् चरणकेशरी श्रेष्ठ व सूर्य भण्डारी दुजः जुयादीगु ‘स्थानीय पाठ््यक्रम निर्माण समिति’ थनिं दछि न्ह्यः हे गठन याःगु खः ।
समितिया संयोजक प्रा. दुवालं स्थानीय पाठ््यक्रम निर्माणया निंतिं थिमिया कला, संस्कृति, सस्म्पदायात महत्व बियागु जानकारी बियादिल । पाठ््यक्रम निर्माणया निंतिं मध्यपुर थिमि लागाया दक्वं सामुदायिक विद्यालयया प्रधानाध्यापक, संस्थागत विद्यालयया प्रिन्सिपल व विद्यालयय् सामााजिक शिक्षा अध्यापन याना वयाच्वंपिं शिक्षक दथुइ सहलह ब्याकागु जानकारी बियादिल ।
लिसें पाठ््यक्रम निर्माण यायेगु झ्वलय् स्थानीय भाषा, कला, संस्कृति, रीतिरिवाज, परम्परा, लिपि आदि विज्ञतलिसे नं सहलह ब्याकेगु नापं शिक्षा ख्यलय् ताःईतक ज्या यानादीपिं शिक्षाविद् व शिक्षक नाप नं परामर्श यानागु वय्कलं कनादिल । संयोजक दुवालं थ्व हे वइगु सिथिनखःनिसें हे स्थानीय पाठ््यक्रमयात लागू यायेगु योजना दुगु जानकारी बियादिसें उकुन्हु सम्बन्धित शिक्षकपिंत सतिक लाःगु लःया स्रोत व मुहानय् वनाः संस्कृतिया बारे अध्ययन याकेगु जुइ धयादिल ।
मध्यपुर थिमि नगरपालिकाया प्रमुख मदनसुन्दर श्रेष्ठं विद्यालय अध्यापन याका वयाच्वंपिं शिक्षक शिक्षिकापिंत नं याकनं हे अभिमुखीकरण तालिम बीगु योजना दुगु जानकारी बियादिसें थ्व हे महिनानिसें स्थानीय पाठ््यक्रम लागू यायेगु जुइ धयादिल । वंगु जेठ १ गतेनिसें हे न्हूगु
पाठ््यक्रम लागू यायेगु योजना दुगु खःसां छुं कारणवश लिपा लाः वंगु नगरप्रमुख श्रेष्ठं कनादिल ।
न्हूगु दयेकूगु पाठ््यक्रमय् भूगोल, इतिहास व पर्यावरणयात न्हापांगु च्याप्टर, स्थानीय नेपालभाषा व नेपाल लिपियात निगूगु च्याप्टर, स्थानीय कला, संस्कृति, सम्पदा, संस्कारयात स्वंगूगु व स्थानीय पेशा व व्यवसाययात प्यंगूगु च्याप्टरया रुपय् दुथ्याकातःगु दु ।
भाय् सःपिनिगु ल्याः म्हो जक दुगु व पाठ््यक्रमयात सर्वमान्य दयेकेगु निंतिं प्यंगू च्याप्टरमध्ये स्थानीय नेपालभाषा व नेपाल लिपियात अध्ययापन याकेगु ई म्हो यानागु जानकारी बियादिसें संयोजक दुवालं धयादिल, ‘क्रमिक रुपं पाठ्यक्रमय् भाषाया विषययात दुथ्याका यंकेगु जुइ ।’
थ्व हे झ्वलय् वंगु वालय् जक विद्यालयस्तरीय पाठ््यक्रमय् स्थानीय मातृभाषा व लिपि समावेश यायेगु विषयय् छगू सहलह जूगु दु । मध्यपुर थिमि नगरपालिका वडा नं. ४ सुंगाःस्थित बालप्रेमी माध्यामिक विद्यालयय् जूगु सहलह ज्याझ्वलय् पाठ््यक्रम निर्माण समितिया संंयोजक प्रा. दुवाल, दुजः श्रेष्ठ, विद्यालय निरीक्षक नेत्र दाहाललिसें भाषासेवीपिं दीपक तुलाधर, विद्यादेवी चित्रकार, संचारकःमि केके मानन्धर व सुन्दर श्रेष्ठं ब्वति कयादीगु खः ।
सहलहया इलय् भाषासेवी तुलाधरं माध्यम भाय्या रुपय् अंग्रेजी व खस् भाय्यात दुथ्याकाः स्थानीय भाय्या रुपय् मांभाय्यात दुथ्याके फइगु सुझाव बियादीगु खः । सरकारं न्हूगु शिक्षा नीति व ऐनपाखें स्थानीय मातृभाषां नं अध्यापन याके फइगु व्यवस्था यानातःगु दुसां न्हू दयेकूगु पाठ््यक्रमय् मातृभाषायात विषयगत रुपय् दुथ्याकातःगु धाःसा मदु ।
LEAVE YOUR COMMENTS