नेपाःया आदिवासीबारे राष्ट्र संघया सीड समिति बैठक, संविधान संशोधन यायेत इनाप
येँ – संयुक्त राष्ट्र संघया सीड समितिं आदिवासी जनजातिया अधिकार सम्बन्धी राष्ट्र संघया घोषणापत्र कथं आत्मनिर्णयया अधिकार सुरक्षित जुइ कथं संविधान संशोधन यायेत नेपाल सरकारयात इनाप याःगु दु । राष्ट्र संघीइ सीड ज्याकू जेनेभाय् च्वंगु सीड समितिया ७१ औं बैठकं नेपाःया संविधानय् आदिवासी जनजातिया अधिकार सुनिश्चित मजूगु धासें सरकारयात संविधान संशोधन यानाः आदिवासीया अधिकार सुनिश्चित यायेत इनाप याःगु खः ।
बैठकय् महिला बालबालिका तथा ज्येष्ठ नागरिक मन्त्री थममाया थापां आदिवासीया सवालय् नेपाःया प्रतिनिधित्व यासें प्रतिवेदन पेश यानादीगु खःसा उकिया विरुद्ध नेपाःया आदिवासी जनजाति व महिला समूहपाखें झिंखुगू प्रतिवेदन बैठकय् न्ह्यब्वःगु खः । उगु प्रतिवेदन बारे सहलह जुइधुंकाः सीड बैठकं नेपाः सरकारयात थ्व इनाप याःगु खः ।
सीड समितिं नेपाःया संविधानय् आदिवासी मिसातय् अधिकार संविधानय् गनं नं न्ह्यथना मतःगु धासें संविधान संशोधन यानाः उकियात सम्बोधन यायेमाःगु निष्कर्ष पिकाःगु खः । आदिवासी मिसातय्त संविधानय् छुं नं कथं अधिकार मदुगुलिं संविधानय् उकिया ग्यारेन्टी यायेत नं सीड समितिं इनाप याःगु दु ।
बैठकय् मन्त्री थापां समितिं सिफारिस याः कथं उकियात कार्यान्वयन यायेगु प्रतिबद्धता प्वंकादीगु खः । लिसें सीड समितिं मेगु थीथी न्यय्स्वंगू सुझाव नं बिउगु दु । सीड समितिया निर्णय कार्यान्वयन यायेत सरकार बाध्यकारी जुइगु खँ धाःगु दु । बैठकय् आदिवासी, महिला व अपांग सहित झिंखुगू संस्थाया दुजःपिंसं संविधान संशोधन यानाः थःपिनिगु अधिकार दुथ्याकेगु ज्या मयात धाःसा आन्दोलन यायेगु ख्याच्वः नं बिउगु दु ।
नेपाःयात दबाब
नेपाःया संविधानयात आदिवासी जनजातिमैत्री दयेकेगु लागिं राष्ट्र संघं नकतिनि जारी याःगु थ्व निर्देशन यक्व सहायकसिद्ध जुइगु खँ आदिवासी नेतातय्सं धाःगु दु ।
यदि राष्ट्र संघं बिउगु थ्व निर्देशनया पालना मजुल धाःसा राष्ट्र संघपाखें नेपाःयात अन्तर्राष्ट्रिय ख्यलं प्राप्त जुयाच्वंगु थीथी सुविधा कटौती यायेगु तकया पलाः न्ह्याके फुगु खँ विज्ञतय्सं धाःगु दु । सीडया थ्व इनाप लिपा आः नेपाःयात जनजातिया पक्षय् संविधान संशोधन यायेत दबाब लाइगु व उकिया लागिं जनजाति ख्यलं नं पहल जुइगु खँ धाःगु दु ।
LEAVE YOUR COMMENTS