ने. सं. ११४४ कछलागा तृतीया -

नेपाःमितय्त जापान वनेत अःपुइगु जुल

येँ – जापानय् ज्या याः वनेगु इच्छा यानाच्वंपिं नेपाःमितय्त आः जापान वने अःपुइ फुगु खँ धाःगु दु । जापान सरकारं अध्यागमन सम्बन्धी न्हूगु विधेयक पारित यायेगु निंतिं संसद छ्वइगु जुइवं नेपाली ज्यामितय्त नं जापान वनेत अःपुइगु आशा प्वंकूगु खः ।थौंकन्हय् जापानं नेपाःमि ज्यामि यंकेगु बारे नेपाःलिसे द्वीपक्षीय सहलह यानाच्वंगु दु ।

थज्याःगु सहलह जुयाच्वंगु इलय् यदि थ्व विधेयक पारित जुल धाःसा नेपाःमि ज्यामित जापान वनेत अझ अःपुइगु खँ धाःगु दु । जापान न्हापांनिसें कडा अध्यागमन नीति ज्वनाच्वंगु देय् खः । तर थीथी ख्यलय् जापानी ज्यामितय् अभाव खनेदुगुलिं थज्याःगु अभाव खनेथाय् ज्या यायेत अध्यागमन नीति भचा ह्वालुकेगु कथं जापान सरकारं न्हूगु विधेयक तयार याःगु खः ।

तर जापान दक्षपिं ज्यामित जक यंकीगुलिं यदि जापान वनेगु खःसा अन आवश्यक जूगु ख्यलय् ज्या यायेफइ कथं दक्ष जुइमाःगु खँ धाःगु दु । दक्ष नेपाःमि ज्यामितय्सं थ्व कानुन पारित जुल धाःसा लबः कायेफइगु खँ धाःगु दु । अथेहे नेपालं थुकी लबः कायेगु खःसा जापानलिसे बल्लाक कुटनीतिक पहल यायेमाःगु खँ नं धाःगु दु ।

जापान सरकारया अन्तर्राष्ट्रिय तालिम सहयोग निकाय (जिट्को) मार्फत छगू दशक न्ह्यवंनिसें नेपाली ज्यामित जापान वनाच्वंगु दु । थौंकन्हय् धाःसा जापान सरकारं प्राविधिक प्रशिक्षण प्रशिक्षार्थी कार्यक्रम (टिइटिपी) मार्फत ज्यामित यंकाच्वंगु दु । श्रम मन्त्रालयया निमित्त सचिव रामप्रसाद घिमिरें बीबीसीलिसे खँ ल्हासें जापान सरकारं न्ह्याकूगु न्हूगु पलाखं नेपालं नं लबः कायेफइगु खँ धयादीगु दु ।

थ्व कानुन वल धाःसा नेपाःमित उखे वनेगु निंतिं भिसा प्रक्रिया सहज जुइगु वय्कःया आशा दु । जापान ज्यामितय् निंतिं सुरक्षित, विश्वास याये योग्य वैदेशिक रोजगार गन्तव्य खः । अन्तर्राष्ट्रिय श्रम संगठनया मापदण्ड कथं श्रम कानुनत लागू यानातःगुलिं जापान मेमेगु देय् स्वयां सुरक्षित गन्तव्य खः ।

जापानय् च्वंगु नेपाली दूतावासया अधिकारीतय्सं नं बीबीसीलिसे खँ ल्हासें थ्व विधेयक जापानया संसदं पास जुल धाःसा नेपाःमि ज्यामितय्त ह्वःताः चूलाइगु खँ धाःगु दु ।

दूतावास नियोगया उपप्रमुख कृष्णचन्द्र अर्यालं संसदं कानून पारित मयायेकं थथे धायेफइगु अवस्था मदु धकाः धयादीगु दु । थौंकन्हय् नं जापानय् आधिकारिक रुपं ८५ हजार नेपाःमित च्वनाच्वंगु दु । उपिं मध्ये अप्वः थें विद्यार्थीया हैसियतं च्वनाच्वंपिं खः ।