प्रवक्ताया नक्कली हस्ताक्षर छ्यलाः विज्ञप्ति

येँ (नेपालभाषा टाइम्स)- श्रम, रोजगार तथा सामाजिक सुरक्षा मन्त्रालयया प्रवक्ताया नक्कली हस्ताक्षर यानाः विज्ञप्ति पिहां वःगु खँ सीदुगु दु । मौसमी ज्यामिया सम्बन्धय् प्रवक्ताया हस्ताक्षर दुरुपयोग यानाः नक्कली विज्ञप्ति पिहां वःगु खः । म्हिगः मन्त्रालयपाखें मेगु छगू विज्ञप्ति पिकासें थ्व जानकारी बिउगु खः ।

वंगु भदौ २० गते चलानी नं. ५०५ च्वयाः प्रवक्ता लिसें सहसचिवया हस्ताक्षर सहित मौसमी ज्यामिया सम्बन्धय् जारी जूगु नक्कली प्रेस विज्ञप्ति प्रति मन्त्रालयया गम्भीर ध्यानाकर्षण जूगु खँ धयातःगु दु ।

मन्त्रालयया प्रवक्ता डण्डुराज घिमिरें पित बिउगु लिपांगु विज्ञप्तिइ धयातःगु दु, ‘सामाजिक सञ्जालय् प्रसारित नक्कली प्रेस विज्ञप्तियात पत्याः यानाः अनावश्यक रुपय् भ्रमय् मच्वनेत सम्बन्धित सकसितं इनाप यानाच्वना ।’

विज्ञप्तिइ मौसमी ज्यामि छ्वयेगु बारे आः तक नेपाः व कोरिया दथुइ छुं नं कथंया सम्झौता मजूगु खँ धयातःगु दु । मौसमी ज्यामि छ्वयेगु सम्बन्धी व्यवस्था मौसमी कामदार व्यवस्थापन निर्देशिका, २०७९ कथं जुइ ।

मन्त्रालयं आधिकारिक निकायया अनुमति मकासे सामाजिक सञ्जालय् वैदेशिक रोजगार बारे प्रचार प्रसार यानाः सर्वसाधारणय् भ्रमय् मलाकेत नं सचेत याःगु दु ।

मन्त्रालयया लेटरप्याडय् नक्कली हस्ताक्षर यासें दुष्प्रचार यानाः भ्रम न्यंकाच्वंपिनि बारे अनुसन्धान जुयाच्वंगु व उमित याकनं कारवाही जुइगु जानकारी नं मन्त्रालयं बिउगु दु ।