गणेश साय्मि हना समितिया सुभाय् देछा

येँ(नेपालभाषा टाइम्स)- कलाकार गणेश साय्मि हना समितिं नेपालभाषा दबू प्याखं ख्यःया नांजाःम्ह निर्देशकलिसें कलाकार गणेश साय्मिया हनाज्याझ्वलय् ग्वाहालि याःपिंत सुभाय् देछाःगु दु । वंगु शुक्रवाः समितिं नेपाःब्यांक्वेटय् छगू ज्याझ्वः यासें हनाज्याझ्वलय् थीथीकथं ग्वाहालि यानादीपिं व्यक्ति व संघसंस्थायात सुभाय् पौ देछासे सुभाय् देछाःगु खः ।

हना समितिया सल्लाहकारलिसें नेवाःन्ह्यलुवा मल्ल के. सुन्दरया प्रमुख आतिथ्यताय् जूगु ज्याझ्वलय् हनाज्याय् आर्थिक, भौतिक, व्यवस्थापन, प्रचार प्रसार लिसें थीथीकथं ग्वाहालि यानादीपिं व हना समितिया दुजःपिंत सुभाय् पौ लःल्हाःगु खः ।

ज्याझ्वलय् नवासें मूपाहां मल्ल के. सुन्दरं भाषा, साहित्यया ख्यलय् जीवंकाःछि ज्वःमदुगु तिबः बियादीपिं अग्रजपिंत राज्यं छुं मयाःसां जनस्तरं छुं यायेमाः धइगु ल्याखं सार्वजनिक रुपं हनेगु परम्परा जुया वयाच्वंगु धासें थ्व क्रम न्ह्यज्याःगु खः, दिउगु मदु धयादिल ।

लिसें वय्कलं भाषा, साहित्य, संस्कृति, कला ख्यलय् तिबः बियादीपिं मेपिं नं आपालं दुगुलिं हाकनं थथे हे झी सकलें जानाः हनेज्यायात निरन्तरता बिया वनेगु जुइ धयादिल ।

समितिया कजि नांजाःम्ह कलाकार राजेन्द्रमान शाक्यं लसकुस यानादिसें हनाज्याझ्वलय् जूगु खर्चया ल्याःचाः नं न्ह्यब्वयादीगु खः ।

नेपालभाषाया दबू प्याखं व संकिपा ख्यःया ज्वःमदुम्ह कलाकारलिसें निर्देशक गणेश साय्मियात वंगु असार २३ गते नागरिकस्तरं तःजिक हनेज्या याःगु खः । उगु इलय् वय्कःयात वय्कःया छेँय् नं सांस्कृतिक बाजंसहित लसकुस यानाः नगदसहित हनापौ देछाना हनेज्या याःगु खः। अथे हे थीथी खल, पुचः, संघ, संस्थां वय्कःयात हनापौ देछासे सम्मान याःगु खः ।

सम्बन्धित बुखँ

LEAVE YOUR COMMENTS