नेपालभाषा पत्रकारिताया इतिहास स्वर्णिम
येँ – मांभाय्या माध्यमं जुयाच्वंगु पत्रकारिता ख्यःया विकासया निंतिं सम्बन्धित मातृभाषी पत्रकार व समुदाय दथुइ सहकार्य जुइमाःगु खँय् सरोकारवालातय्सं बः बिउगु दु । लिसें मातृभाषी पत्रकारया सहकार्यपाखें तःधंगु संचारगृह (बिग मिडिया हाउस) निर्माण यायेमाःगु नं इमिसं धाःगु दु ।
नेवाः पत्रकार राष्ट्रिय दबूया ग्वसालय् वंगु आइतवाः अन्तर्राष्ट्रिय मातृभाषा दिवसया लसताय् ग्वसाः ग्वःगु ‘थौंया नेपालभाषा पत्रकारिता’ विषयक अन्तक्र्रिया ज्याझ्वलय् सरोकारवालातय्सं उगु खँ धाःगु खः । ज्याझ्वलय् मू वक्ताया थासं ‘नेपालभाषा टाइम्स’ न्हिपौया सम्पादक सुरेश किरण मानन्धरं नेपालभाषा पत्रकारिता ख्यलय् व्यावसायिकताया विकास यायेमाःगु आवश्यक जूगु खँय् बः बियादिल ।
थौंकन्हय् नेपालभाषाया पत्रकारिता ख्यः भाषा सेवाया भावनां जक न्ह्यः वनाच्वंगु धासें आः वयाः आर्थिक पक्षयात नं स्वाकाः न्ह्यःने न्ह्याः वनेमाःगु आवश्यक जुइधुंकूगु वय्कलं धयादिल । ‘भाषा सेवा यायेगु हे ल्याखं जक आपालं नेवाः पत्रकारत जक मखसे संचारमाध्यमत क्रियाशील जुयाच्वंगु दु । थुकी लखौंया लगानी नं जुयाच्वंगु दु’, वय्कलं धयादिल, ‘आः लगानी व प्रतिफलया योजना दयेकाः नेवाः पत्रकारत नं न्ह्याः वनेगु स्वयेमाः ।’
नेपालभाषा पत्रकारिता ख्यःया इतिहास तसकं हे स्वर्णिम जूसां नं वर्तमान इलय् आपालं समस्या दुगु व अज्याःगु समस्या ज्यंकाः वने फलत धाःसा हाकनं स्वर्णिम अवस्थाय् लिहां वये फइगु वय्कःया धापू दु ।
दबूया केन्द्रया नायः सुरजवीर वज्राचार्यं नेपालभाषा पत्रकारिता ख्यःया विकासया निंतिं दबू न्ह्याबलें क्रियाशील जुयाच्वनी धयादिल ।
नेपालभाषाया न्हापांगु अनलाइन पोर्टल ‘नेपालभण्डल डटकम’या अस्मीत मल्लं नेपालभाषाया अनलाइन माध्यमं आत्मसमीक्षा यायेमाःगु आवश्यक जूगु खँ धयादिल ।
नेवाः एचडी टेलिभिजनया अध्यक्ष नवीन जोशीं सीमित स्वकुमि व सीमित बजाःया दथुइ मातृभाषा टेलिभिजन संचालनय् समस्या दुगु धासें राज्यं मातृभाषाया टेलिभिजनयात स्वयेगु दृष्टिकोण हिलेमाः धयादिल ।
दबूया उपाध्यक्ष नृपेन्द्रलाल श्रेष्ठ, दबूया केन्द्रीय दांभरिं सुरेन्द्रभक्त श्रेष्ठ, दुजःपिं विराजकाजी राजोपाध्याय, मीना वज्राचार्यं नं नुगःखँ तयादीगु ज्याझ्वलय् दबूया सल्लाहकार, थीथी जिल्लाया प्रतिनिधि, थीथी संचारमाध्यमया नेवाः पत्रकारतय् उपस्थिति दुगु खः ।
LEAVE YOUR COMMENTS