प्रदेशया सुरक्षा यायेगु जिम्मा प्रदेश प्रहरीया जुइ

येँ – संघीय समाजवादी फोरमया सहअध्यक्ष नापं प्रतिनिधिसभा सदस्य राजेन्द्र श्रेष्ठं थःगु प्रदेश दुने च्वंपिं जनतायात शान्ति सुरक्षाया प्रत्याभूति बीगु सरकारया न्हापांगु जिम्मेवारी व प्राथमिकता जुइमाःगु खँ धयादीगु दु । थन जूगु छगू ज्याझ्वलय् वय्कलं उगु खँ धयादीगु खः ।

केन्द्र सरकारं स्वदँतक नं प्रदेश प्रहरी सम्बन्धी आवश्यक कानून निर्माण मयाःगुलिं हे आः वयाः केन्द्र व प्रदेश सरकारया दथुइ अन्तरद्वन्द्व ब्वलंगु खः धासें पार्टीया कार्यवाहक अध्यक्षतकं जुयादीम्ह श्रेष्ठं धयादिल, ‘प्रदेश सरकारं दयेकूगु कानून संविधानलिसे ल्वात धाःसा स्वतः खारेज जुइ तर, संविधानलिसें मिले मजूगु व ज्वःमलाःगु कानून जूगु उकियात कार्यान्वयनय् हयेमाः ।’

ज्याझ्वलय् नेकपाया सत्यनारायण मण्डलं थःपिंसं प्रतिपक्षीया हैसियतं फोरम व राजपाया मंकाः सरकारयात विश्वासया मत बियाः ग्वाहालि यानागु खः धासें ताःई न्ह्यवंनिसें मधेशय् खने दयाच्वंगु अस्थिरता व अशान्तियात स्थायीत्व बीगु निंतिं नं थःपिंसं प्रदेश सरकारयात ग्वाहालि यानागु दावी यानादिल ।

अथे हे नेपाली कांग्रेसया रमेश लेखकं नं प्रदेश प्रहरी दयेमाःगु खँय् बः बियादिसें प्रदेश प्रहरीया न्हापांगु दायित्व धइगु हे प्रदेश व जनतायात सुरक्षा यायेमाःगु व थथे जुल धाःसा शान्ति सुरक्षा दुगु नं महसुस याये फइ धयादिल । प्रदेश नं. २ या सरकारं प्रदेश प्रहरी तयेगु निंतिं ऐन हयेवं थुकियात कयाः विवाद ब्वलनाच्वंगु खः ।