थिमिइ पद्मरत्नया बिचाः मुँज्या

थिमि- शंखधर सिरपाः समितिया नायःनापं नेवाः न्ह्यलुवा, मानवअधिकारवादी नेता पद्मरत्न तुलाधर मदुगु लत्याया पुण्यतिथि लाकाः छगू विचाः मुँज्या जुल । समितिया ग्वसालय् नगदेशया गणेश मा.वि.इ जूगु विचाः मुँज्या समितिया दुजः डा. पुष्पराज राजकर्णिकारया सभापतित्वय् जूगु खः ।

उगु विचाः मुँज्याय् नेवाः न्ह्यलुवा मल्ल के. सुन्दरं मदुम्ह तुलाधरलिसे जानाः आन्दोलनय् कुहां वयागु इलय् जेलय् प्रहरीया कथितक नयाः ब्वलंकागु नेपालभाषा मंकाः खलः व नेवाः देय् दबूया मंकाः दबू छेँयात थौं सीमित मनूतय्सं थःगु स्वार्थया निंतिं छ्यलाः मंकाः खलःयात हे ध्वस्व यानाः मृतप्रायः यायेत स्वयाच्वंगु द्वपं बियादिल ।

मेम्ह नेवाः न्ह्यलुवा डा. महेशमान श्रेष्ठं स्वनिगः दुने च्वंगु दक्वं जग्गा जमिनय् पिनें वःपिंसं कब्जा यायेधुंकूगुलिं आः जग्गा मीगु ज्यायात हे प्रतिबन्ध तयेमाःगु विचाः तयादिल । प्रदेश नं. ३ या प्रदेशसभा सदस्य मय्जु प्रतिमा श्रेष्ठं सही सोच व विचाः तयाः जीवन हनाच्वंपिनिगु कदर यानाः इमिसं न्ह्याकाथकूगु ज्यायात आः म्वानाच्वंपिंसं जिम्मा कयाः न्ह्यःने यंकेमाः धयादिल ।
नेपालभाषा मंकाः खलःया छ्यांजे नरेशवीर शाक्यं आदिवासी जनजातितय् दक्व अधिकारया जननी नेपालभाषा मंकाः खलःयात आः न्हूधाः यानाः न्हूकथंया हे ज्याझ्वः पित बियाः न्ह्यःने यंकेगु योजना दुगु जानकारी बियादिल ।

मध्यपुर थिमि नगरपालिकाया प्रमुख मदनसुन्दर श्रेष्ठं सरकार स्पष्ट रुपं घोषणा मयाःसां स्थानीयस्तरं हे जूसां नं पद्मरत्न तुलाधरया नामं प्रतिष्ठान चायेकेमाःगु खँय् बः बियादिसें उकिया नगरपालिकापाखें छगू लाख तका ग्वाहालि यायेगु बचं बियादिल ।

ज्याझ्वःया सभापति राजकर्णिकारं जातीय समानता नापं भाषिक व जातीय अधिकारया निंतिं निरन्तर रुपं थःत पानादीम्ह पद्मरत्नयात म्वाका तयेगु खः धइगु जूसा प्रदेश व स्थानीय सरकारं स्थानीय तहय् नेपालभाषायात पाठ््यक्रमय् अनिवार्य यायेमाःगु विचाः तयादिल ।
ज्याझ्वलय् सिद्धिदास प्रतिष्ठानया अध्यक्ष नरेन्द्रभक्त हाडा, संस्कृतिविद् गणेशरामा लाछि, कैलाशभक्त प्रधानांगपिंसं नं पद्मरत्न तुलाधरया थीथी पक्षयात कयाः थःथःगु नुगःखँ प्वंकादीगु खः ।

सम्बन्धित बुखँ

LEAVE YOUR COMMENTS