चुनाव यायेत ई मगाना वल

येँ (नेपालभाषा टाइम्स)÷मंसिरं याये धयातःगु प्रतिनिधिसभा व प्रदेश– सभा चुनावया मिति घोषणा मयाःगु कारणं इलय् चुनाव यायेत थाकुइफुगु खँ निर्वाचन आयोगं धाःगु दु ।

आयोगं चुनावया निंतिं अनुमानित तिथि स्वयां १२० न्हु न्ह्यः थःपिंत जानकारी यायेमाः धासें आः वइगु मंसिर ४ गते चुनाव याये मफइगु सुझाव सरकारयात बियातःगु खः । मंसिर ४ गते वयेत नं आः ११३ न्हु जक ल्यं दनि ।

सीदुकथं आयोगं सरकारयात निर्वाचन यायेत उपयुक्त न्हि कथं मंसिर १० गते तकया ‘डेड लाइन’ बियातःगु दु । मंसिर १० गते लिपा हिमाली लागाय् च्वापु गायाः मतदान याके फइगु अवस्था दइ मखु धासें आयोगं मंसिर १० स्वयां उखे लिमछ्यायेत नं सरकारयात सुझाव बियातःगु खः । यदि मंसिरय् चुनाव याये मफुत धाःसा चैतय् लिहां वने मालीगु खँ नं आयोगं धाःगु दु ।

थ्वहे झ्वलय् आयोगं बियाहःगु सुझावया हे आधारय् सरकारं निर्वाचनया गृहकार्य यानाच्वंगु खँ सीदुगु दु । सरकारं आयोगपाखें वःगु तिथि कुन्हु हे चुनाव याकेगु कथं तयारी यानाच्वंगु खँ सूत्रं धाःगु दु । उकिया नितिं प्रधानमन्त्री लिसे मन्त्रीतय्सं सत्ता साझेदार गठबन्धनया नेतात लिसे सहलह ब्याकाच्वंगु दु ।
मेखे सरकारया प्रवक्ता लिसें सञ्चारमन्त्री ज्ञानेन्द्रबहादुर कार्कीं नं सरकारं चुनावया तिथि क्वःछीगु बारे सहलह यानाच्वंगु खँ कनादीगु दु । तर मिति छु जुइ धइगु खँ धाःसा वय्कलं कनामदी ।
वंगु बिहीवाः जक माओवादी केन्द्रया अध्यक्ष पुष्पकमल दाहालं प्रधानमन्त्री शेरबहादुर देउवा चुनावया मिति क्वःछीगु बारे थःलिसे परामर्श याःगु धासें थम्हं नागरिकता विधेयक पारित यानाः जक चुनावया तिथि घोषणा यायेगु उपयुक्त जुइ धकाः सुझाव बियागु खँ कनादीगु खः ।

मेखे निर्वाचन आयोग धाःसा सरकारं मंसिर ४ गते हे चुनावया तिथि घोषणा याइगु खँय् धुक्क जुयाच्वंगु दु । आयोगया प्रमुख आयुक्त दिनेश थपलियां मंसिर ४ गते हे निर्वाचनया तिथि क्वःछीगु खँय् थः धुक्क जुयाच्वनागु खँ धायेगु यानाच्वंगु दु । आयोगं मंसिर २ गते चुनाव याये माली धकाः सुझाव बिउगु खःसा सरकारं मंसिर ४ गते मिति प्रस्ताव याःगु खँ धाःगु दु ।

मंसिर १० गते लिपा नं चुनाव मजुल धाःसा पुस, माघ व फागुन महिनाय् चुनाव याये मफइगु आयोगया सुझाव दु । आयोगया कथं चिकुलां हिमालय लागाय् च्वापु गाइगु लिसें ख्वाउँ अप्वयाः मनूत गामय् मच्वनीगु जुयाः चुनाव यायेगु सम्भव मदु । चुनाव चैत वैशाख तक लिहां वन धाःसा उकी कानुनी जटिलता दुगु खँ नं आयोगं धाःगु दु । आयोगं न्ह्याथे यानाः नं मंसिर ४ गते मखुसा १० गते दुने चुनाव याकेमाः धकाः सरकारयात ताकेता यानाच्वंगु दु ।

आयोगं वइगु मंसिर २२ गते प्रतिनिधिसभा व प्रदेशसभाया कार्यकाल क्वचाइगु जुयाः मंसिर २२ गते तक निर्वाचनया ज्या क्वचायेकेमाः धकाः दावी यानाच्वंगु दु ।

सम्बन्धित बुखँ

LEAVE YOUR COMMENTS