ने. सं. ११४६ बछलागा चौथी -

फुक्क हे सांसदया पीसीआर टेष्ट

संसदीय अधिवेशन च्वनेत संसद भवनय् विशेष तयारी

येँ (नेपालभाषा टाइम्स) – न्ह्यःने वयाच्वंगु संसदया चिकुलाया अधिवेशन यायेगु लागिं सरकारं प्रतिनिधि सभाया फुक्क हे सांसदतय्गु पीसीआर परीक्षण याइगु जूगु दु । थुकिया निंतिं संसद सचिवालयं सरकारलिसे खँ ल्हानाच्वंगु सीदुगु दु ।चिकुलाया अधिवेशन सम्भवतः आः वइगु पुस १७ दुने याइगु खनेदु । थुगुसी चिकुलाया अधिवेशन यायेत कोरोना संक्रमणपाखें बचे जुइगु लागिं थीथी कथंया सुरक्षाया उपाय नालीगु खँ धाःगु दु ।

थुगुसी संसदय् छगू न्हूगु कथंया उपकरण नं जडान याइगु खँ जुयाच्वंगु दु गुकिं संसद भवन दुने प्रवेश याइपिं सांसदतय्गु ज्वरो तापाक च्वनाः हे नापे यायेगु ज्या याइ । थौंकन्हय् थें बन्दुक क्यनाः ज्वरो नापे मयासे क्यामेरां स्वयाः हे ज्वरो नापे याइ । थर्मोग्राफिकक्यामरा नांया थ्व उपकरणं सांसदतय्त ६ मिटरया दुरीइ च्वनाः हे ज्वरो नापे यायेधुंकी । सांसदपिं न्यासि वनाच्वँच्वं हे क्यामेरां वयागु ज्वरो नापे यानाः अनसं च्वंगु स्क्रिनय् क्यना बीधुंकी । छुं जुयाः सांसदया ज्वरो १०२ डिग्री स्वयां अप्वः जुल धाःसा वयात तुरुन्त हे संसद दुने हे अलग्ग क्वथाय् तयेयंकी । वयात आवश्यक परीक्षण यानाः माल धाःसा अस्पताल वा छेँय् छ्वया बीगु ज्या जुइ । तापाक हे च्वनाः मनूया ज्वरो नापे यायेगु थ्व उपकरण धाःसा नेपालय् हे दयेकूगु खः । थुगुसी संसद दुने नेपाःया थःगु हे उत्पादन ‘शो यायेगु’ ल्याखं नं थ्व उपकरण अन तयेत्यंगु खँ धाःगु दु ।

संसद भवन दुने सांसदत च्वनेगु व्यवस्था नं थुगुसी न्हापा स्वयां पाइगु खँ धाःगु दु। न्हापा छगू सिट लिपा मेगु सिटय् जक सांसद च्वनेगु व्यवस्था याना तःगु खःसा दर्शकदीर्घा व पत्रकारत च्वनीगु थासय् तकं सांसद हे च्वनेगु व्यवस्था यायेत्यंगु दु ।

येँय् एन्टिजेन परीक्षण शुरु
राजधानी येँ देय् दुने समुदायस्तरय् न्यना वनाच्वंगु कोरोना संक्रमणया स्तर गन थ्यन धकाः सीकेगु लागिं सरकारं एन्टिजेन परीक्षण शुरु याःगु दु । येँया स्वद्वःम्ह मनूयात थज्याःगु परीक्षण यायेगु तयारी सरकारं यानाच्वंगु खँ सीदुगु दु । येँया थीथी लागाय् याइगु थ्व परीक्षणपाखें येँय् कोरोना संक्रमणया अवस्था गथे दु धकाः सीके फइगु खँ धाःगु दु। थ्व परीक्षण व्यक्ति–व्यक्तियाके याइगु खःसां थुकिया प्रयोजन धाःसा समुदायया अवस्था सीकेगु खः । इपिडिमियोलोजी तथा रोग नियन्त्रण महाशाखां धाःकथं एन्टिजेन परीक्षणपाखें सु मनूयाके कोरोना दु वा मदु धकाः बाघौया दुने हे धाये फइ । पीसीआर परीक्षण यायेत धाःसा म्होतिं नं ८ घन्टाया ई माः । थुकिं वइगु लिच्वः पीसीआर थें ‘एकुरेट’ जुइ मखु धाःसां समुदायस्तरया लिच्वः सीकेत धाःसा थ्व उपयोगी जुइगु खँ धाःगु दु ।