स्थानीय तहया अधिकार व स्वायत्तता माग यासें जनमतया प्रदर्शन
येँ (नेपालभाषा टाइम्स) – जनमत पार्टीं स्थानीय तहया अधिकार व स्वायत्तता कार्यान्वयनया माग यासें म्हिगः फिब्वख्यलय् विरोध प्रदर्शन याःगु दु । पार्टीया नेता, कार्यकर्ता सहित विरोधय् प्रदर्शनया झ्वलय् ‘कांग्रेस कम्युनिष्ट ठगे यात’, ‘बालेन, ठगे यायेमते,’ ‘स्वायत्तता बीगु थःगु बचं पूवंकी’ व स्थानीय सरकारयात अधिकार बिउ’ धइगु नारा च्वयातःगु प्लेकार्ड नं प्रदर्शन याःगु खः ।
प्रदर्शनकारीतय्सं संघीय लोकतान्त्रिक गणतन्त्रया मर्म कथं स्थानीय तहयात संविधानं बिउगु अधिकार पूर्ण रुपय् कार्यान्वयन जुइमाःगु, स्थानीय सरकारयात माःगु स्रोधसाधन व निर्णय यायेगु अधिकार सुनिश्चित यायेमाःगु नापं जनतालिसे याःगु प्रतिबद्धता पूवंकेमाःगु माग नं याःगु दु ।
प्रदर्शनकारीतय्सं थीथी राजनीतिक दलं चुनावया इलय् याःगु प्रतिबद्धता कार्यान्वयन मयाःगु द्वपं बिसें स्थानीय स्वायत्तता व जनउत्तरदायी शासन प्रणालीयात धिसिलाकेत सरकार गम्भीर जुइमाःगु खँ धाःगु दु ।
प्रदर्शनया झ्वलय् शान्तिपूर्ण नाराबाजी यासें स्थानीय तहया अधिकार क्वपालेगु ज्या मयायेत व संघीयताया प्रभावकारी कान्र्यान्वयन यायेत सरकारया ध्यानाकर्षण नं याकूगु दु ।
जनमत पार्टीं संघीय संरचनायात अझ प्रभावकारी दयेकाः स्थानीय सरकारयात अधिकार सम्पन्न यायेमाःगु थःपिनिगु मागयात सम्बन्धित निकायं ध्यान मबिल धाःसा थप आन्दोलनया ज्याझ्वः सार्वजनिक यायेगु ख्याच्वः नं बिउगु दु ।
जनमत पार्टी प्रधानमन्त्री बालेन साहयात मधेश आन्दोलन, थरुहट आन्दोलन व स्वराज आन्दोलन लिसे सम्बन्धित वंगु इलय् जूगु सम्झौता
कार्यान्वयन यायेत माग यासें ११ बुँदे ज्ञापन पौ येँ प्रमुख जिल्ला अधिकारी ईश्वरराज पौडेल मार्फत ज्ञापन पौ बिउगु दु । जनमतया मधेश प्रदेशया संसदीय दलया नेता चन्दन सिंह सहित नेतातय्सं प्रधानमन्त्रीया ज्ञापन पौ बिउगु खः ।
पार्टी अध्यक्ष डा. सिके राउतं हस्ताक्षर यानातःगु ज्ञापन पतिइ पहिचान, अधिकार, सम्मान व स्वायत्तताया मुद्दायात राज्यं ताः इलंनिसें बेवास्ता यानाःगु खँ न्ह्यथनातःगु दु ।
LEAVE YOUR COMMENTS