
रासस- सहरी विकास मन्त्रालयं वइगु असारनिसें हे फोहर वायेगु व्यवस्था यायेकथं बञ्चरे डाँडाय् दीर्घकालीन फोहर संकलन केन्द्र निर्माणया ज्या तीव्ररुपय् न्ह्यःने न्ह्याकूगु दु । थौंकन्हय् निर्माण ज्या अन्तर्गत चा मिले यायेगु व ड्याम निर्माण यायेगु ज्या जुयाच्वंगु मन्त्रालयं न्ह्यथंगु दु । आः वइगु छुं दिंया दुने उगु ज्या सिधयेकाः मेगु ज्या शुरु यायेगु तयारी जुयाच्वंगु दु ।
मन्त्रालयया प्रवक्ता कृष्णप्रसाद दवाडीयाकथं वा वइगु इलय् स्वनिगलय् अप्वः फोहर मनेगु याइ उकिं दक्वं फोहर व्यवस्थापन याये मफुसां नं असारनिसें छुं फोहर तयेगु फइकथं निर्माणया ज्या जुयाच्वंगु दु । वय्कलं धयादिल, ‘पूर्णरुपय् ज्या सिधयेत स्वदँया ई काइ, फोहर तयेगु थाय्या अभाव जूगुलिं ड्याम निर्माण यायाः वनेगु व म्हो जक जूसां फोहर नं तयेगु ज्या यायेगु योजना मन्त्रालयया दु ।’ औपचारिक रुपय् निर्माण वंगु १२ गतेनिसें शुरु जूगु खः । लछिया बोलपत्र आह्वान याःगु इलय् निर्माणया जिम्मा लुम्बिनी कोशी न्यौपाने जेभीं प्राप्त याःगु दु ।
आतक डिजाइन व चाया परीक्षण यायेगु ज्यालिसें क्षेत्र निरीक्षणया ज्या नं सिधये धुंकूगु दु । थौंकन्हय् फोहर व्यवस्थापन जुया वयाच्वंगु थाय् सिसडोल स्वयां निगू किलोमिटर तापाक निर्माण यायेत्यंगु दीर्घकालीन फोहर व्यवस्थापन स्थलतक वनेत सडक विभागं लँ दयेकेगु ज्या नं यानाच्वंगु दु । निर्माणया निंतिं मन्त्रालयं ३८ गू करोड बजेट फ्याःगु दु । मन्त्रिपरिषद्या वंगु मंसिर १७ गतेया बैठकं दीर्घकालीन फोहर व्यवस्थापन स्थल निर्माण यायेगु ज्याया जिम्मा सहरी विकास मन्त्रालययात बीगु निर्णय याःगु खः । करिब १५ मिटर तजाःगु बाँध व मेमेगु पूर्वाधारसहितया फोहर विसर्जनस्थल निर्माण जुइगु मन्त्रालयं न्ह्यथंगु दु ।
मन्त्रालययात निर्माणया जिम्मा बी न्ह्यः उगु थाय् निर्माणया ज्या स्थानीय तहं यायेगु कि केन्द्र सरकारं यायेगु धइगु विषयय् अन्योल जुयाच्वंगु ख । निर्णयकथं बाँध निर्माणया ज्या सहरी विकास मन्त्रालययात व विसर्जनस्थल तक वनेगु लँ निर्माण सडक विभागयात बिउगु खः । वंगु झिंस्वदँ न्ह्यवंनिसें सिसडोलय् स्वनिगःया झिंच्यागू स्थानीय तहया फोहर वायेगु याना वयाच्वंगु दु । स्वनिगलं न्हिं द्वःछि मेट्रिक टन स्वयां अप्वः फोहर पिहां वः । स्वनिगःपाखें न्हिथं उत्सर्जन जुइगु फोहरमध्ये करिब ७५ प्रतिशत फोहर सिसडोलय् व्यवस्थापन याना वयाच्वंगु दु ।
थुखे येँ महानगरपालिकां वा वइगु ईया निंतिं सिसडोलया हे जःखः अल्पकालीन फोहर विसर्जनस्थल क्वःछिउगु दु । येँ मनपा वातावरण विभागया प्रमुख हरिकुमार श्रेष्ठयाकथं वा वयेगु मौसम शुरु जूगुयालिसें फोहरया अनुपात नं अप्वइगु व आः अवस्थाय् सिसडोलय् फोहर व्यवस्थापन यायेगु अवस्था मदुगुलिं मेगु हे थाय् क्वःछीमाःगु खः ।
श्रेष्ठयाकथं वा वइगु ईया निंतिं थौंकन्हय् फोहर वायेगु यानाच्वंगु थाय् स्वयां छुं भचा क्वये ‘भिलेज वान’ व ‘भिलेज टू’ क्वःछिनातःगु दु । थनिं झिंस्वदँ न्ह्यः निदँया निंतिं धकाः स्वनिगःया फोहर सिसडोलय् व्यवस्थापन याना वयाच्वंगु दु । दीर्घकालीन फोहर वायेगु थाय् निर्माण जुयाच्वंगु थाय् धादिङ व नुवाकोटया जिल्लाया सिमानाय् लाः । दीर्घकालीन फोहर विसर्जनस्थल निर्माणया ज्यां गति काःगुयालिसें व स्वनिगलय् वा वयेगु शुरु जूगुलिसें फोहर द्वँचिनेगु समस्यां स्वनिगःवासी आः मुक्त जुइगु येँ मनपाया विश्वास दु ।
स्वनिगलं जक न्हिं १२०० मेट्रिक टन फोहर सिसडोलय् व्यवस्थापन यायेगु याना वयाच्वंगु दुसा उकीमध्ये येँ महानगरपाखें ५०० मेट्रिक टन फोहर व्यवस्थापन याना वयाच्वंगु दु । येँ मनपा व निजी कम्पनीया निसः गाडी फोहर व्यवस्थापन यानावयाच्वंगु दु ।
LEAVE YOUR COMMENTS