माधव पुचःया बिस्कं ज्याकू

येँ – एमाले पाखें निलम्बित नेता माधव नेपाल व झलनाथ खनाल पुचलं बिस्कं हे ज्याकू चायेकीगु जूगु दु । म्हिगः वरिष्ठ नेता नेपालं थःपिंसं न्हूगु पार्टी ज्याकू चायेकेगु निंतिं छेँ मालाच्वनागु खँ धयादीगु दु ।

म्हिगः येँय् थःगु पक्षीय युवा संघ नेपालया ज्याकू उलेज्या यासें वय्कलं पार्टी ज्याकू चायेकेगु खँ कनादीगु खः । सर्वोच्च अदालतं वंगु फागुन २३ गतेया फैसला कथं नेपाल पुचलं जेठ २ गते दुगु पार्टी कमिटीया नेतृत्वयात स्वीकार यायेमाःगु अडान कयाच्वंगु दुसा प्रधानमन्त्री केपी ओलीं नेकपा विभाजन जूगु इलय् दुगु पार्टी कमिटीया निर्णययात हे निरन्तरता बियाच्वंगु दु ।

थ्वहे झ्वलय् नेपाल पुचलं थःगु पक्षय् दुगु जिल्ला संगठन व वर्गीय संगठनयात निरन्तरता बीगु जूगु दु । सर्वोच्च अदालतया निर्णय लिपा पार्टी २०७५ साल जेठ २ गतेया अवस्थाय् वंगु धासें उगु इलय् थःगु पक्षया नेता कार्यकर्ता गुगु अवस्थाय् दुगु खः आः वहे कायम याना वनेगु खँ सांसद जीवनराम श्रेष्ठं कनादीगु दु । ‘नेपाल– भाषा टाइम्स’ लिसे खँ ल्हासें वय्कलं धयादिल, ‘सर्वोच्च अदालतया निर्णय कथं पार्टी न्हापाया अवस्थाय् वनेधुंकूगुलिं न्हापा जिमिगु पक्षय् दुपिंसं हाकनं थःगु पद कथं ज्याखँ न्ह्याकेगु निर्णय जूगु दु । पार्टी आः वहे कथं न्ह्याः वनी ।’

थ्वहे झ्वलय् एमाले प्रवक्ता प्रदीप ज्ञवालीं समानान्तर गतिविधि पनेत नेपाल पुचःयात इनाप यानादीगु दु । थथे यानाच्वन धाःसा कारबाही यायेगु ख्याच्वः बिसें वय्कलं धयादिल, ‘पार्टी मयःगु खःसा मेगु पार्टी चायेकूसां जिउ वा मेगु गुगुं पार्टीइ वंसां जिउ ।’

वय्कलं एमालेया दुने गुगुं नं कथंया समानान्तर गतिविधि यायेगु धयागु पार्टीयात विखण्डित यायेगु खँ धासें धयादिल, ‘जितः नेकपा एमाले मयल धाःसा मेगु हे पार्टी चायेकेगु जुइ, वा देशय् दुगु पार्टी लिसें स्वापू तयेधकाः धायेफइ ।’

 

 

सम्बन्धित बुखँ

LEAVE YOUR COMMENTS