एमसीसीया विरोध याःपिंत ज्वन

येँ -एमसीसीया विरोध यासें प्रदर्शन याःपिं मोहन वैद्य नेतृत्वया नेकपा (क्रान्तिकारी माओ–वादी) या खुम्ह कार्यकर्तायात प्रहरीं ज्वंगु दु । प्रहरीया कथं अमेरिकी राजदूतावास न्ह्यःने प्रदर्शन यानाच्वंपिं अखिल क्रान्तिकारीया अध्यक्ष हरि गजुरेलल व महासचिव पेशल दाहाललिसे खुम्हेसित ज्वंगु खः ।

गृह मन्त्रालयं एमसीसीया विरोध व भारतीय प्रधानमन्त्रीया पुत्ला च्याकेगु गतिविधिइ दुथ्याःपिंत तत्काल ज्वनेत प्रहरीयात निर्देशन बियातःगु खः । उगु हे निर्देशन कथं म्हिगः सुथंनिसें प्रदर्शन याये फइगु थीथी थासय् प्रहरीयात अलर्ट यानातःगु खः । गृह मन्त्रालयं भारतीय व अमेरिकी राजदूतावास न्ह्यःने मनू ममुंकेत व भेला मयाकेत नं निर्देशन बियातःगु खः ।

वंगु शुक्रवाः जक गृह मन्त्रालयं छगू विज्ञप्ति जारी यासें भारतीय व अमे जःलाःखःला देय् लिसेया सम्बन्धय् आँच वये फइगु खँ धासें कारबाही यायेगु ख्याच्वः बिउगु खः । थ्वहे झ्वलय् सत्ता गठबन्धन नेकपा (एस) समर्थित अखिलं गृहमन्त्री बालकृष्ण खाँणया पुत्ला च्याकूगु दु । भारतीय प्रधानमन्त्रीया पुत्ला च्याकूगु खँय् गृह मन्त्रालयं आपत्ति प्वंकेवं अखिलं म्हिगः नेपाल कमर्स क्याम्पस न्ह्यःने गृहमन्त्रीया पुत्ला च्याकूगु खः ।