ने. सं. ११४४ बछलाथ्व दशमी -

येँ महानगरया ज्याकू काठमाडौं प्लाजाय् तइगु

येँ(नेपालभाषा टाइम्स)÷येँ महानगरपालिकां काठमाडौं प्लाजा बालं काइगु जूगु दु । महानगरं काठमाडौं प्लाजा बालं कायेगु निंतिं नेपाल ट्रष्टलिसे छगू सम्झौता नं याःगु दु । वंगु बुधवाः ट्रष्टया सचिव सरजुकुमार वैद्यया उपस्थितिइ येँ महानगरया प्रमुख प्रशासकीय अधिकृत वसन्त अधिकारी व ट्रष्टया सहसचिव विष्णुकुमार ढकालं सम्झौता पती ल्हाःचिं तयादीगु खः ।

सम्झौता लिपा महानगरया छुं छुं विभाग व विभाग अन्तर्गतया ज्याकू काठमाडौं प्लाजाय् स्थानान्तरण याइगु जूगु दु । विभाग व विभाग अन्तर्गतया ज्याकूपाखें बिया वयाच्वंगु सेवाय् समस्या मजुइक ज्याकूत प्लाजाय् स्थानान्तरण याना यंकेगु योजना दुगु महानगरया प्रमुख प्रशासकीय अधिकृत अधिकारीं कनादीगु दु ।

सम्झौताकथं प्लाजाया झ्याः, खापा, लुखा, लिफ्टलिसें स्यानाच्वंगु संरचना महानगरं मर्मत याइगु जूगु दु । उकथंया संरचना मर्मत वापत जूगु खर्च महानगरं बालं वापतया ध्यबाय् कटे याइगु जूगु दुसा थ्व बाहेकं मेमेगु आवश्यकताकथंया संरचनाया नं मर्मत नं महानगरं हे याइगु जूगु दु । थुकथंया मर्मत याइगु इलय् प्लाजाया पिनेया संरचनाय् धाःसा गुगुं नं हेरफेर याइमखु ।

भवनया प्रयोग वापत जुइगु लः, मतलिसें मेमेगु सुविधाया बिलया भुक्तानी नं महानगरं हे याइ । थःगु क्षेत्रं पिने लाःगु अधिकार वा प्रयोजनय् मदुगु छुं नं संरचनाया टुटफुट जूसा उकिया नं खर्च महानगरं हे याइगु जूगु दुसा थ्व बाहेकं थःगु नियन्त्रणं पिने लाःगु परिस्थिति मेगु छुं नं कथंया संरचना मर्मत सम्भार महानगरं मयायेगु नं सम्झौता पती न्ह्यथनातःगु दु ।

सम्झौता लिपा उगु भवन महानगरं थःगु प्रयोजनय् हइगु जूगु दु । छुं कारणवश भवन त्वःते माल व त्वःतके मालधाःसा १८० न्हु न्ह्यः हे छगू पक्षं मेगु पक्षयात जानकारी बीमाःगु नं सम्झौता पती धयातःगु दु । थ्व सम्झौता १० दँया निंतिं खःसा न्यादँ लिपा १० प्रतिशतं बाः वृद्धि यायेगु नं सम्झौता पती धयातःगु दु ।

२०७२ सालय् भुखाय् ब्वयाः बागदरवार क्षति जुइवं छुं ई राष्ट्रिय सभागृहपाखें सेवा बिया वयाच्वंगु खःसा थौंकन्हय् बागदरवार लिक्कं च्वंगु जेडीए कम्प्लेक्सं सेवा बिया वयाच्वंगु दु । महानगरया दक्वं विभाग छगू थासय् तयेगु सम्भव मजुइवं थीथी थासय् तयाः सेवा बिया वयाच्वंगु दुसा आः थुकथं थीथी थासय् न्यना वनाच्वंगु दक्वं संरचना, सेवा व ज्याकूयात छगू हे थासय् तयाः व्यवस्थित यायेगु ल्याखं काठमाडौं प्लाजाया भवन बालं काःगु खः ।