न्यातँपौ देगः पुनःनिर्माण विषयय् अन्तक्र्रिया

ख्वप- विश्व सम्पदाया धलखय् दुथ्यानाच्वंगु थनया तःमधिइ च्वंगु ऐतिहासिक व पुरातात्विक महत्वया सम्पदा न्यातँपौ देगःया पुनःनिर्माणया विषययात कयाः अन्तक्र्रिया ज्याझ्व जुल । ख्वप नगरपालिकापाखें विश्व सम्पदाया धलखय् दुथ्यानाच्वंगु उगु देगःया पुनःनिर्माणया विषययात कयाः उगु अन्तक्र्रिया ज्याझ्वः याःगु खः ।
ख्वप नपां थःगु सभाकक्षय् ग्वसाः ग्वःगु अन्तक्र्रिया ज्याझ्वलय् झायादीम्ह मूपाहां नेपाल मजदुर किसान पार्टी (नेमकिपा)या सचिव नापं प्रतिनिधि सभा सदस्य पे्रम सुवालं छुं नं वस्तुया आयु दयाच्वनी धासें नेपाः भुखाय्या उच्च जोखिमय् लानाच्वंगु देय् जूगुलिं परम्परागत रुपय् छ्यलीगु निर्माण सामग्री हे छ्यलाः मौलिक शैलीं न्यातँपौ देगःया नं पुनःनिर्माण यायेमाःगु सुझाव बियादिल ।

प्रदेश सांसद सुरेन्द्रराज गोसाइँ नं ‘ङातापोल्हं’ धइगु देगःया छगूयां छगू जक मौलिक नांयात हे जक खस् व अंगे्रजी भासं प्रचार प्रसार यायेमाः धयादिल । प्रा. डा. पुरुषोत्तमलोचन श्रेष्ठं सांस्कृतिक सम्पदातय्गु इलय् व्यलय् संरक्षण, संवद्र्धन यायेमाःगु खँय् बः बियादिल । अन्तक्र्रिया ज्याझ्वलय् नवासें प्रा. सुदर्शनराज तिवारीं अप्पा व सिँनापं नेपाली प्रविधि विश्वया हे नमूनाया रुपय् दयाच्वंगु खँ कुलादिल ।

पुरातत्व विभागया पुलांम्ह महानिर्देशक विष्णुराज कार्कीं अमूत कलाया निंतिं थःपिंसं कुतः यानाच्वनागु खँय् बः बियादीगु ज्याझ्वलय् मेम्ह वक्ता पुलांम्ह न्यायाधिश गौरीबहादुर कार्कीं ख्वपया दक्वं देगःया अध्ययन यानाः प्रतिवेदन तयार यायेमाःगु खँय् बः बियादिल ।

प्रा. डा. सिद्धिवीर वज्राचार्यं धार्मिक व जनविश्वासयात दुवालाः होम, यज्ञया महत्वयात नं थुइका वनेमाःगु सुझाव बियादिल । संस्कृतिविद् भरत शर्मां उपभोक्तामार्फत ज्या जूसा पुनःनिर्माण बांलाइगु विचाः प्वंकादिल । अथे हे गुथि संस्थान ख्वपया प्रमुख हरिप्रसाद सुवेदीं पुरातात्विक ल्याखं महत्वपूर्ण हरेक सम्पदाया पुनःनिर्माण याये न्ह्यः उकिया अध्ययन यायेमाःगु खँ धयादिल ।

ख्वप नगरपालिकाया प्रमुख सुनिल प्रजापतिया सभापतित्वय् जूगु अन्तक्र्रिया ज्याझ्वलय् ख्वप जिल्लया प्रहरी प्रमुख एसपी सविन प्रधान व दरवार हेरचाह अड्डा ख्वपया प्रमुख मोहनसिंह लामां नं नुगःखँ प्वंकादीगु खःसा ख्वप इन्जिनियर कलेजया रविना शिल्पकारं न्यातँपौ देगःयात कयाः थःपिंसं यानादीगु अध्ययन प्रतिवेदन स्लाइड मार्फत प्रदर्शन यानादीगु खः ।