ने. सं. ११४६ अनलाथ्व पञ्चमी -

स्थानीयपाखें पशुपति विकास कोषय् धर्ना

कोषलिसे जूगु सम्झौता कार्यान्वयन मयासे तिलगंगाय् डोजर चले याःगु द्वपं

येँ (नेपालभाषा टाइम्स) – तिलगंगा क्षेत्रया बस्ती चीकूगु खँय् स्थानीय बासिन्दां विरोध प्वंकूसें पशुपति क्षेत्र विकास कोष न्ह्यःने धर्ना बिउगु दु । धर्ना बिउपिं स्थानीय बासिन्दातय्सं थःपिं लिसे जूगु पुलांगु सम्झौता कार्यान्वयन यायेत माग याःगु दु ।

पशुपति क्षेत्र विकासया निंतिं २०७१ सालय् गुरुयोजना लागू यायेगु झ्वलय् तिलगंगायात नं दुथ्याकूगु व उगु इलय् पशुपति क्षेत्र विकास कोषलिसे जग्गा सट्टाभर्ना सम्बन्धी सम्झौता जूगु खः । तर आः उगु सम्झौतायात कार्यान्वयन मयासे जबर्जस्ती बस्ती जक चीकेगु ज्या याःगु धासें स्थानीयतय्सं विरोध याःगु खः । स्थानीय बासिन्दां पशुपति बजाः व वनकाली क्षेत्रया बासिन्दातय्त जग्गा बिउसां नं थःपिंत धाःसा सुकुम्बासीया धलखय् तयाः डोजर चले याःगु द्वपं बिउगु दु ।

सरकारं छुं न्हि न्ह्यः थनाछ्वःपिं तिलगंगाया स्थानीयत सुकुम्बासी मखुसें लालपूर्जा दुपिं जग्गाधनीत खः । उपिं च्वनाच्वंगु छुं जग्गा गुथि अन्तर्गत व छुं जग्गा रैकर खः । स्थानीतय्सं पशुपतिइ जुइगु थीथी परम्परागत जात्रा पर्व सञ्चालन याये त तकं उगु क्षेत्रया आम्दानी छ्यला वयाच्वनागु खँ धाःगु ।

थ्वहे झ्वलय् उगु थाय् लाःगु कामपा ८ नं वडाया अध्यक्ष आशामान संगतं तिलगंगाय् च्वनाच्वंपिं सुकुम्बासी मखुगु खँ स्पष्ट यानादीगु दु । ‘नेपालभाषा टाइम्स’ लिसे खँ ल्हाये गु झ्वलय् वय्कलं २०७१ सालय् पशुपति क्षेत्र विकास कोष व स्थानीय वासिन्दा दथुइ सम्झौता जुयाः पशुपतिया थीथी जग्गा अधिग्रहण यायेगु ज्या जूगु खँ धयादीगु दु । ‘उगु इलय् कोष व स्थानीय वासिन्दा दथुइ सम्झौता जूकथं स्थानीय बासिन्दां थःगु छेँय् त्वःते गु इलय् उखेथुखे मलायेमा धकाः तिलगंगा क्षे त्रय् यंकाः तयेयंकूगु खः । तर आः वयाः सुकुम्बासी धाःगु दु, थ्व पाय्छि मखु’ वडा अध्यक्ष संगतं धयादीगु दु ।

‘जग्गा अधिग्रहण यानाः काःसां नं मुआब्जा आः तक बिउगु मदुनि । जग्गा अधिग्रहण याये गु झ्वलय् मुआब्जाया लिसें सहुलियत भावं स्थानीय बासिन्दायात मेगु थासय् जग्गा बीगु सम्झौता जूगु खः । तर आः तक जग्गा बीगु ज्या पशुपति विकास कोषं याःगु मदुनि’, वय्कलं धयादीगु दु ।

अध्यक्ष संगतया कथं कोष व स्थानीय वासिन्दा दथुइ सम्झौता जूगु इलय् पशुपति क्षेत्रय् छेँ त्वःते माःपिंत गोठाटारय् ४ आना जग्गा बीगु खँ जूगु खः । स्थानीय जनताया समस्यायात कयाः कोषया पदाधिकारीतय्सं माक्वः ध्यान मबिउगु द्वपं नं वडा अध्यक्ष संगत बियादीगु दु ।

आः स्थानीय जनताया समस्या समाधानया निंतिं छुं प्रक्रिया न्ह्यानाच्वंगु दु ला ? धयागु न्ह्यसःया लिसलय् वय्कलं सरकारया निर्णयया कारणं थौंकन्हय् पशुपति विकास कोष पदाधिकारीबिहीन जुयाच्वंगुलिं समस्या जुयाच्वंगु खँ धयादीगु दु ।

स्थानीय बासिन्दां विरोध प्रदर्शन यायेगु झ्वलय् ‘विश्व सम्पदा धलखय् लाःगु क्षेत्रय् डोजर चले याइपिंत कारबाही ग्व ?’ , ‘डोजर चले जुल १९य्, जानकारी वल २१’ , ‘जिपिं सुकुम्बासी मखु’ , ‘जिपिं पीडित खः, पीडक मखु, जिपिं स्थानीय खः, सकुम्बासी मखु’ धयागु प्लेकार्ड नं ब्वःगु खः ।

पशुपति विकास कोषं दयेकूगु गुरुयोजनाया कारणं आपालं स्थानीय वासिन्दा विस्थापित जुइमाःगु अवस्था वयाच्वंगु दु । थ्व कारणं अनया परम्पारगत जात्रापर्वय् तकं लिच्वः लानाच्वंगु दु ।