सत्यमोहनयात ‘सुदर्शन–कपिला’ सिरपाः

येँ  – वाङमय शताब्दीपुरुष सत्यमोहन जोशीयात शुक्रवाः येँय् छगू ज्याझ्वःया दथुइ निगू ‘सुदर्शन–कपिला सिरपाः’ लःल्हासें सम्मान यात । पुलांम्ह राष्ट्रपति रामवरण यादवं वय्कःयात छ्यनय् बेतालिं चिकुसें उगु सम्मान लःल्हानादीगु खः ।निगू लाख तकाया थ्व सिरपाः नेपालभाषा ख्यलय् आः तक दुगु मध्ये दकलय् अप्वः धनराशीया सिरपाः खः ।

विराटनगरया झी पुचःया व्यवस्थापनय् सुदर्शन–कपिला ट्रष्टपाखें निदँय् छक्वः बीगु कथं थुगुसी थ्व सिरपाः नीस्वंगु खःसा न्हापांगु सिरपाः भाजु जोशीयात लःल्हाःगु खः । ज्याझ्वलय् न्ववासें मूपाहां पुलांम्ह राष्ट्रपति यादवं नेपालभाषा नेपालय् आदिकालंनिसें अस्तित्वय् दुगु भाषा खःसा थुकियात थीथी इलय् शासकतय्सं न्हंकेगु कुतः याःगु खःसां उपिं ताःलाये मफुत धयादिल ।

सिरपाः लःल्हाना कासें भाजु जोशीं नेपालभाषा व नेवाः संस्कृतिक च्वन्ह्याकेगु ज्याय् विराटनगरया नेवाःतय्सं यानाच्वंगु ज्या च्वछायेबहः जू धयादिल ।नेवाः न्ह्यलुवा मल्ल के. सुन्दरं मनूया राष्ट्रियता, धर्म, थाय्बाय्, सिद्धान्त वा ल्हाइगु भाषा हे परिवर्तन जूसां वयागु जातीय म्हसीका गबलें नं परिवर्तन जुइ मखु धासें नेवाःतय्सं थःगु राजनीतिक सिद्धान्तय् जक लिकुंका मतयेत इनाप यानादिल ।

वय्कलं सिरपाःया दाता सुदर्शन बहादुर श्रेष्ठ व वय्कःया पुर्खां विराटनगरय् नेवाः जागरण थनेत याना–दीगु ज्याखँया नं चर्चा यानादिल ।
ज्याझ्वलय् नेवाः मिसा दबूया नायः रश्मिला प्रजापति लिसें झी पुचःया दुजःपिंसं नं न्ववानादीगु खः ।

सम्बन्धित बुखँ

LEAVE YOUR COMMENTS