नेपाःया मय्जुयात अमेरिकाय् उपाधि

येँ (नेपालभाषा टाइम्स)-अमेरिकाय् च्वनादीम्ह नेपाःमि मय्जु राजश्री श्रेष्ठं अन जूगु मिसेस टुरिजम् युएसए–२०२४ उपाधी त्याकादीगु दु । अमेरिकाया भर्जिनिया राज्यया फेयरफ्याक्स काउन्टीइ उगु कासा जूगु खः । कासाय् ब्वति काः वःपिं आपालं प्रतियोगीतय्त लिउने लाकाः वय्कः उपाधि त्याकेत ताःलाःगु खः । थ्व स्वयां न्ह्यः वय्कलं ‘मिसेस वाशिंगटन डिसी–२०२४’ या उपाधि नं त्याकादीगु खः ।

मिसेस टुरिजम् युएसए उपाधि त्याकेधुंकाः आः वय्कलं मिसेस युनिभर्स कासाय् ब्वति काये दइगु जूगु दु । थ्वहे वइगु अक्टोबर महिनाय् थाइल्याण्डय् जुइगु मिसेस युनिभर्स कासाय् आः वय्कलं अमेरिकाया प्रतिनिधित्व यासें ब्वति कयादी । थम्हं उगु उपाधि नं त्याके फइगु विश्वास वय्कलं प्वंकादीगु दु ।

नेपालं छुं दँ न्ह्यः अमेरिका वनाः च्वनादीम्ह मय्जु राजश्रीं अमेरिकाय् जुइगु थीथी सांस्कृतिक ज्याझ्वलय् ब्वति कयादीगु दु । वय्कलं अन जुइगु थीथी नेवाः ज्याझ्वलय् नं नेवाः हुलाप्याखं प्रस्तुत यानादीगु दु ।
अथेहे अमेरिकाय् च्वंपिं नेपाःमितय्सं दयेकूगु थीथी फिल्मय् नं वय्कलं अभियन यानादीगु दु । अथे हे अन दयेकीगु आपालं म्युजिक भिडियोलय् नं वय्कलं मोडल जुयाः ज्या यानादीगु दु ।