गुरुङया उम्मेदवारी खारेजी विरुद्ध अन्तरिम आदेश
येँ (नेपालभाषा टाइम्स)÷सर्वोच्च अदालतं रुपन्देही–२ या नेकपा एकीकृत समाजवादीया उम्मेदवार राजु गुरुङया उम्मेदवारी खारेज यायेगु निर्वाचन अधिकृतया निर्णय कार्यान्वयन मयायेत अल्पकालीन अन्तरिम आदेश जारी याःगु दु ।
आइतवाः न्यायाधीश विश्वम्भर प्रसाद श्रेष्ठया इजलासं गुरुङया उम्मेदवारी खारेज यायेगु निर्णय कार्यान्वयन मयायेत अल्पकालीन आदेश बिसें अन्तरिम आदेशया नितिं निगुलिं पक्षयात कार्तिक २ गते सहलहया नितिं सःतूगु दु । उकथं हे सर्वोच्च अदालतं निर्वाचन आयोगयात विपक्षी गुरुङया उम्मेदवारी खारेज यायेमाःगु कारण तकं माग याःगु दु ।
बैंकिङ कसुर मुद्दाय् हाकुगु धलखय् लाःगु धासें निर्वाचन अधिकृत उदवीर नेपालीं वंगु असोज २६ गते गुरुङया उम्मेदवारी खारेज यायेगु निर्णय याःगु खः । गुरुङं निर्वाचन अधिकृतयात उम्मेदवारी खारेज यायेगु अधिकार मदुगु धासें थःगु उम्मेदवारी खारेजीया निर्णय विरुद्ध सर्वोच्च अदालतय् रिट तःगु खः ।
सर्वोच्च अदालतं रिट निवेदनया माग बमोजिम अन्तरिम आदेश जारी यायेम्वाःगु छुं कारण दुसा न्हय्न्हुया दुने लिखित लिसः बीत नं आदेश
बियातःगु दु ।
थ्वहे झ्वलय् सर्वोच्च अदालतं प्रतिनिधिसभाया उम्मेदवार प्रभु साह, विजयकुमार गच्छदार सहित गुम्हेसिया विरुद्ध लाःगु रिट धाःसा खारेज याःगु दु । सर्वोच्च अदालतया अनिलकुमार सिन्हाया एकल इजलासं अधिवक्ता अनिल आचार्यं दायर याःगु रिट निवेदन खारेज याःगु खः ।
रिट निवेदनय् सुनसरी ३ स नेपाली कांग्रेसया उम्मेदवार जुयाच्वंम्ह गच्छदार, मनाङं उम्मेदवारी बिउम्ह टेकबहादुर गुरुङ, तनहुँ क्षेत्र नं. १ पाखें स्वतन्त्र उम्मेदवारी बिउम्ह गोविन्दराज जोशी, रौटहत क्षेत्र नं. ३ या स्वतन्त्र उम्मेदवार प्रभु साह लगायतया उम्मेदवारी खारेज यायेमाःगु माग यानातःगु खः ।
अथे हे चितवन क्षेत्र नं. २ या राष्ट्रिय प्रजातन्त्र पार्टीया उम्मेदवार विक्रम पाण्डे, सिरहा क्षेत्र नं. १ या स्वतन्त्र उम्मेदवार सरिता गिरी, सिन्धुपाल्चोक क्षेत्र नं. १ (क) या एमाले उम्मेदवार डिबी तामाङ, महोत्तरी क्षेत्र नं. १ या एमाले उम्मेदवार लक्ष्मी महतो व झापा क्षेत्र नं. ५ (ख) या माओवादी उम्मेदवार रेवतराज पुरीया उम्मेदवारी खारेज यायेत माग यानातःगु खः ।
LEAVE YOUR COMMENTS