
येँ – प्रधान–मन्त्री केपी ओलीं भृकुटीमण्डपय् जूगु सार्वजनिक आमसभापाखें माधव नेपाल, झलनाथ खनाल लगायतया नेतातय्त चैत्र ७ गते च्वनीगु पार्टीया केन्द्रीय बैठकय् ब्वति काः वा धकाः सार्वजनिक रुपं ‘ब्वनापौ’ छ्वयेवं आः नेकपा (एमाले) छप्पँ मजुइगु जकं खः लाकि धइगु आशंका तःधं जुया वंगु दु ।
एमाले अध्यक्ष एवं प्रम ओलीं अथे खुल्ला रुपं बैठकय् ब्वति काः वा धकाः आह्वान यायेवं उगु बैठकय् ब्वति काः वनेगु लाकि मवनेगु धकाः ‘निर्णय’ यायेत माधव–झलनाथ पुचलं नं चैत्र ४ व ५ गते थःगु पक्षया कार्यकर्तातय् राष्ट्रिय भेला सःतूगु दु ।
प्रम ओलीयात काउन्टर बीगु रणनीति दयेकाच्वंपिं माधव–झलनाथ पुचलं थःगु शक्ति परीक्षण यायेगु ल्याखं नं ४–५ गतेया थ्व भेला सःतूगु अनुमान याःगु दु । यदि भेला तःधं जुयाः उत्साहजनक जुल धाःसा ओली विरुद्ध मेगु पलाः ल्ह्वनेगु तकया बिचाः माधव–झलनाथ पुचलं दयेकाच्वंगु खँ सीदुगु दु ।
प्रम ओलीं नं माधव–झलनाथ पुचलं यायेत्यंगु थ्व भेलायात कयाः छुं टिप्पणी याःगु मदुनि । विज्ञ सूत्रतय् अनुमान कथं ओलीं नं माधव–झलनाथ पुचःयाके गुलि शक्ति दनि धकाः परीक्षण यायेगु लागिं भेला याके बीगु बिचाः यानाच्वंगु खनेदु । माधव पुचःयात आः गज्याःगु व्यवहार याना वने माली धइगु रणनीति नं ओलीं उगु भेला स्वयेधुंकाः जक तय याइगु खँ धाःगु दु ।
प्रम ओलीं बैठकया एजेण्डा उल्लेख यासें पौ बियाः सःतेमाःगु पार्टीया केन्द्रीय बैठक तकं सार्वजनिक मञ्चं आह्वान याःगुलिं थ्व नेपाल–खनाल पुचःयात याःगु अपमान खः धकाः तायेकूगु दु । ओलीया आशय आः नेपाल–खनाल पुचः एमालेय् दुहां मवःसां जिउ धइगु आशय खनेदु धाःगु दु । तर नेपाल–खनाल पुचलं नं एमाले थःपिनिगु नं पार्टी जूगुलिं याउँक त्वःते मजिउ धइगु बिचाः तयाच्वंगु दु ।
LEAVE YOUR COMMENTS