महानगरव्यापी धाःबाजं कासाय् ङत तुलाधर न्हाप

येँ(नेपालभाषा टाइम्स)÷येँ महानगरपालिका सम्पदा तथा पर्यटन विभागया ग्वसालय् जूगु येँ महानगरस्तरीय धाःबाजं धेंधेंबल्लाः कासा– ११४४ य् ङत तुलाधर समिति न्हाप लाःगु दु । येँ महानगरपालिका स्वर्णिम योजना सांस्कृतिक महानगर अन्तर्गत येँ महानगरस्तरीय धाःबाजं कासाय् कसाः तःधं गुथि लिउ व थँहिति मानन्धर गुथि लियांलिउ लाःगु दु ।
शनिवाः थनया राष्ट्रिय सभागृहय् जूगु धाःबाजं कासाय् गुंलाया इलय् न्हियान्हिथं स्वयम्भूइ द्यःइके वनीगु येँया दुनेया लागाया थीथी खलः पुचः, धाःबाजं गुथिलिसें चारुमति गुंला बाजं (चाःबही), जयबाजेश्वरी धाःबाजं खलः यानाः मुक्कं नीनिगू धाःबाजं खलकं ब्वति काःगु खः ।

मूपाहां येँ महानगर उपप्रमुख सुनिता डंगोलं कासाय् न्हाप, लिउ व लियांलिउ लाःगु बाजं खलःयात धाःबाजंया प्रतीककथं वहःया ट्रफी, दसिपौ व दांलिसें ब्वति काःगु बाजं खलःया दसिपौ लःल्हानादीगु खः ।

ज्याझ्वःया उलेज्या यानादिसें मूपाहां उपप्रमुख डंगोलं महानगरपाखें थ्व स्वयां न्ह्यः धिमे कासा, बासुरि कासा यायेधुनागु खँ कुलादिसें थुकथंया कासाया उद्देश्य थुकथंया अमूर्त सम्पदाय् समर्पित पुलांपिंत प्रोत्साहन व न्हूपिंत उत्साह ब्वलंकेगु खः धयादिल । लिसें वय्कलं कासाय् ब्वति कायेत वयेबलय् गबलें नं तनावपूर्ण मनस्थिति तयाः वये मजिउ धासें गुलि नं तनाव कायेमाःगु खः, व अभ्यासया इलय् बांलाक प्रस्तुति बीगु निंतिं कायेमाःगु व कासाय् वयेबलय् तनावपूर्ण स्थितिं मुक्त जुयाः वःसा जक बांलाक प्रस्तुति बी फइ धयादिल ।

थुकथं हे वय्कलं महानगरपालिकां मौलिक संस्कृति, रीति, रहनसहन, जीवनपयोगी ख्यलय् आपालं ज्या यानाच्वंगु व छुं मयासे मगाःगु, यायेमाःगु योजनात दुसा लिखित रुपं प्रस्ताव बियादीत नं इनाप यानादिल । थौंकन्हय् महानगरपालिकां वइगु आर्थिक दँया निंतिं बजेट हयेगु निर्माणया प्रक्रियाय् वनाच्वगु इलय् थःपिंसं मखनाच्वंगु तर यायेमाःगु ज्याझ्वः व योजना दुसा वइगु आर्थिक दँय् यायेगु ल्याखं लिखित रुपं हे सुझाव बियादीत त्वाः, गुथि, खलःयात इनाप यानादिल ।

कासाय् न्हाप लाःगु ङत तुलाधर समितिं जय जय काली, श्वेतकाली, सिन्हाज्या व चस्वांमाया धुन न्ह्यब्वयादीगु खःसा लिउ लाःगु कसाः तःधं गुथि त्वः, प्रताललिसें मेमेगु तालय् व लियांलिउ लाःगु थँहिति मानन्धर गुथिं जय नमो (जति), जंजाल त्वःताः वनेमाल (प्रताल) व नारायण द्यःयाथाय् भ्वय् नयाः यानाः प्यंगू तालय् प्रस्तुति बिउगु खः ।
येँ महानगरपालिका सम्पदा तथा पर्यटन समितिया संयोजकलिसें ८ वडाअध्यक्ष आशामान संगतया सभापतित्वय् जूगु ज्याझ्वलय् वय्कलं हे लसकुस यासें व ज्याझ्वःया औचित्ययात कयाः नुगःखँ तयादीगु खः ।

ज्याझ्वलय् पाहांकथं समितिया दुजःलिसें १८ वडाअध्यक्ष न्हुछेकाजी महर्जन, गुंला बाजं संरक्षण तथा व्यवस्थापन संघया नायः अमिरमान शाक्य, विभागया प्रमुख कुमारि राईया उपस्थिति दुगु खः ।
कासाया निर्णाणकमण्डलय् इन्दिरा लाछिमस्यू (ख्वप), विभूषण शाक्य (यल) व ओमप्रकाश शाक्य (किपू) च्वनादीगु खः ।

सम्बन्धित बुखँ

LEAVE YOUR COMMENTS