
येँ(नेपालभाषा टाइम्स)- कन्हय् माघ १ गते घ्यःचाकु संल्हूकुन्हु तोखाय् ‘चाकु दिवस’ न्यायेकेत्यंगु दु । नेपाः युवा क्लब तोेखाया ग्वसालय् तोखा परम्परागत चाकु संरक्षण समाजया सहकार्यृय् घ्यःचाकु संल्हु तोखा मू बजारय् ‘चाकु दिवस’ न्यायेकेत्यंगु खः । चाकु उत्पादनया निंतिं नांजाःगु व चाकुया ‘हब’या रुपय् कयातःगु तोखाय् चाकु दिवसया लिसें सांस्कृतिक ज्याझ्वः व हनाज्याझ्वः नं जुइ ।
समाजया नायः कृष्ण श्रेष्ठं तोखा देय् दुने उत्पादन जूगु चाकु व थुकिं दयेकातःगु नँसात्वँसा चाकु दिवसया ब्वज्या जुइगु खँ कनादिल ।
चाकु उत्पादन यायेत माःगु तु खेती जुइगु तुख्यःपाखें हे अप्रभंस जुयाः तोखा जू वंगु धइगु मान्यता दु । नेपालभाषाया ‘टु’ व ‘ख्यः’ खँग्वःपाखे तोखा जूगु धाइ । तोखा परम्परागत चाकु संरक्षण समाज अन्त्र्गत थौंकन्हय् १४ गू चाकु उद्योग आवद्ध जुयाच्वंगु दु ।
थ्व हे झ्वलयय् तोखा नगरपालिकां टोखा देय्या ऐतिहासिक म्हसीका ल्यंका तयेगु निंतिं तु पिइगु ज्याझ्वःयात नं न्ह्याकेत्यंगु दु । अथे हे तोखाया म्हसीका ल्यंका तयेकथं कथं चाकु स्तम्भ नं निर्माण यायेत्यंगु दु ।
LEAVE YOUR COMMENTS