क्यानाडाया ब्यापारीयात जासुसी याःगु द्वपनय् चीनय् जेल सजाय
- नेपालभाषा टाइम्स
- ???? ???????? तृतीया
- किपा-चीनया डानडोङय् च्वंगु अदालत
एजेन्सी- चीनया छगू अदालतं क्यानाडाया छम्ह ब्यापारीयात जासुसी याःगु द्वपं बियाः झिंछदँया जेल सजाय बिउगु दु । क्यानाडेली ब्यापारी माइकल स्पाभोर सन् २०१८ निसें चीनया हिरासतय् लानाच्वंम्ह खः । चीनया डानडोङय् च्वंगु अदालतं बुधवाः छगू वक्तव्य पिकयाः क्यानाडेली ब्यापारी माइकल स्पाभोरं चीनया जासुुसी यानाः चीनयागु गोप्य जानकारी मेगु देसय् थ्यंकूगु द्वपनय् दोषी ठहर जूगु धाःगु खः । ब्यापारी माइकलयात झिंछदँया जेल व ५० द्वः चिनियाँ युआन जरिवाना यायेगु फैसला अदालतं न्यंकूगु खः ।
अदालतं जेल सजायँ क्वचाये धुंकाः ब्यापारी माइकलयात देसं पितिना छ्वयेगु फैसला नं याःगु दु ।
क्यानाडाया प्रधानमन्त्री जस्टिन टुडाें चीनया अदालतं याःगु फैसला पूर्णरुपं अस्वीकार्य व अन्यायपूर्ण जूगु व कानुनी प्रक्रिया नं पारदर्शि मजूगु धाःगु दु । प्रधानमन्त्री जस्टिनं व्यापारी माइकलयात याःगु कारबाहीलय् अन्तर्राष्ट्रिय कानुनया न्यूनतम मापदण्ड नं पूमवंकू धाःगु दु ।
क्यानाडाय् चीनया हुवावे कम्पनीया प्रमुख वित्तिय अधिकृत मेङ वान्झोउयात ज्वनेवं चीनय् नं क्यानाडेली व्यापारी माइकल स्पाभोर व मेम्ह छम्ह क्यानाडाया नागरिक कोभ्रिगयात ज्वंगु खः । आलोचकतय्सं चीनं माइकल व कोभ्रिगयात ज्वंगु कारण मेङयात त्वःतकेगु निंतिं चीनं राजनीतिक बार्गेनिङ यायेत खः धयाच्वंगु दु ।
LEAVE YOUR COMMENTS