संस्कृत विविया छेँ थुनेत सिफारिस

येँ (नेपालभाषा टाइम्स)- थनया बसन्तपुलिइ च्वंगु संस्कृत विश्वविद्यालय भवन थुनेत येँ महानगरपालिकां सिफारिस याःगु दु । येँ मनपाया उपप्रमुख सुनिता डंगोलया संयोजकत्वय् नीस्वंगु समितिं छेँ दुनाः अन छुं नं इलय् तःधंगु धनजनया क्षति जुइफु धइगु प्राविधिक प्रतिवेदनया आधारय् उगु छेँ थुनेगु सिफारिस याःगु खः ।

येँ मनपाया १३ क्वःगु कार्यपालिका बैठकं उपप्रमुख डंगोलया संयोजकत्वय् वडा नं. ८ या अध्यक्ष लिसें सम्पदा समितिया संयोजक आशामान संगत व वडा नं. २३ या वडा अध्यक्ष मचाराजा महर्जन दुजः दुगु समिति स्वंगु खः ।

बसन्तपुलिइ पुलांगु नव आदर्श स्कुलया नापसं च्वंगु संस्कृत विश्वविद्यालयया उगु पुलांगु छेँ थुनेगु लागिं ताः ई न्ह्यवंनिसें सः थ्वयाच्वंगु खःसां उकिया सुनुवाइ धाःसा मजुयाच्वंगु खः । येँ मनपां आः उगु छेँ थुनाः उकियात खुल्ला याना तयेगु नीति दयेकूगु खँ सीदुगु दु । थाय् खुल्ला यायेमाःगु जुयाः अन च्वंगु नव आदर्श स्कुलयात नं बन्द यानाः मेमेगु सरकारी स्कुललिसे समायोजन यायेधुंकूगु दु ।