समाजसेवी जयराम बासुकलाया झिंप्यक्वःगु लुमन्ति मुँज्या

ख्वप – थनया पुलांम्ह गाविस अध्यक्ष नापं समाजसेवी जयराम बासुकलाया झिंप्यक्वःगु लुमन्ति मुँज्या वंगु शनिवाः जुल । जयराम स्मृति अक्षय कोषया ग्वसालय् उगु लुमन्ति मुँज्या जूगु खः ।ज्याझ्वलय् मूपाहां नेपाल मजदुर किसान पार्टीया केन्द्रीय सचिव नापं सांसद प्रेम सुवालं सिद्धान्त व अनुशासनया पालना बांलाक यानाः निरन्तर रुपं संगठन विस्तारया ज्याय् सक्रिय जुयाच्वनादीम्ह बासुकला जनताया मिखाया नानी खः धयादिल ।

नेमकिपाया वैकल्पिक केन्द्रीय दुजः नापं प्रदेश नं. ३ या प्रदेशसभा सदस्य सुरेन्द्रराज गोसाई नेमकिपा मंत धाःसा संघीय संसद व प्रदेशसभाय् नं प्रतिपक्षी धइपिं हे सुं नं मदुगु खँ न्ह्यथनादिसें नेमकिपाया उपस्थितिं अन्याय व अत्याचारयात पनेगु ज्या जुयाच्वंगु दु धयादिल ।

नेमकिपा सौडोलया अध्यक्ष नारायण भक्त न्हेम्हाफुकी, चाँगुनारायण नगरपालिका ९ वडा अध्यक्ष राजु त्यात लगायत थीथी वक्तातय्सं नं बासुकलाया थीथी पक्ष व योगदानयात कयाः नवानादीगु खः ।

जयराम स्मृति अक्षय कोषया अध्यक्ष रामचन्द्र बासिया सभातित्वय् जूगु ज्याझ्वलय् मूपाहां सांसद सुवालं स्थानीय ९ वडाया निम्ह ज्येष्ठ नागरिक राधिका राउट व मीनबहादुर बस्नेत क्षेत्रीयात नगदसहित दोसल्ला न्ययेकाः सम्मान नं यानादीगु खः ।