यलय् बम सहित विप्लवया नेता ज्वन

यल – सरकारं प्रतिबन्ध तयातःगु नेत्रवित्रम चन्द (विप्लव) नेतृत्वया नेकपाया छम्ह नेतायात यलय् बम सहित ज्वंगु दु ।

यल महानगरपालिका-११य् च्वनीम्ह सानुराज बज्राचार्य (श्याम)यात शुक्रवाः बहनी महनगरीय प्रहरीं ज्वंगु खः । विप्लव पुचःया डिसिएस श्यामयात यलया इखाँछे च्वनाच्वंगु कोठां ज्वंगु खः । कटुवा पेस्तोल छपु व स्वंगः बम सहित वयात ज्वंगु खः । स्वंगलं बम नेपाली सेनाया बम डिस्पोजल पुचलं डिस्पोज याःगु खः । प्रहरीं श्याम च्वनीगु कोठाय् विप्लव पुचःया सफु, लेटर प्याड नं लुइकूगु दु ।

न्हापा यलय् याःगु विस्फोटय् बज्राचार्यया ल्हाः दुगु आशंका प्रहरीं याःगु दु । प्रहरीं थुकीया बारे थप अनुसन्धान यायेगु खँ धाःगु दु ।