काराेनापाखें सजग जुइत येँ महानगरपालिकाया इनाप

वंगु छुं ई न्ह्यवंनिसें विश्वन्यंकं महामारी जुयाः न्यना वनाच्वंगु कोभिड–१९ (कोरोना भाइरस) या ग्याःचिकुं देय् छगुलिं भयभीत जुयाच्वंगु दु । संघीय राजधानी समेत दुगु येँ महानगरपालिका थ्व ग्याःचिकुपाखें बिस्कं लाइगु खँ हे मन्त । थन महानगरया थः हे स्ववासीलिसें देय्न्यंकंया नागरिकत नं थीथी पेशा व्यवसाय यानाः च्वनाच्वंगु दु । विदेशी नागरिकत वये–वने जुइगु मू केन्द्र समेत जूगु कारणं विश्वव्यापी महामारीया रूपय् न्यना वनाच्वंगु कोभिड-१९ (कोरोना भाइरस) या संक्रमण थन याकनं न्यना वने फइगु खतरायात ध्यानय् तयाः झी सकलें सजग जुइमाःगु अतिकं आवश्यक खनेदु ।

उकिं संक्रमण खने दये न्ह्यः हे झी सकलें नागरिकत सजग जुल धाःसा यक्व हद तक थुकियात न्यूनीकरण याये फइगु सम्भावना नं दइ । थ्व संक्रमण अप्वः भीडभाड जुइगु थासय् याकनं न्यना वनीगु जूगुलिं संघीय सरकारं पित बिउगु सूचंया लिधंसाय् फयांफछि अप्वः सचेत जुइत सकल नगरवासीयात दुनुगलंनिसें इनाप यानाच्वना ।

येँ महानगरपालिका देय्या छगू महत्वपूर्ण सांस्कृतिक नगर जूगु कारणं थनया मौलिक परम्परा, संस्कृति व सम्पदा ल्यंकेगु नं उतिकं तःंधंगु दायित्व दु । थीथी इलय् न्यायेकीगु थनया विशिष्ट जात्रापर्वया लिसें मूर्त अमूर्त सम्पदाया संरक्षण व सम्बद्र्धन यायेगु तःधंगु दायित्व नं झीगु ब्वहलय् दु । थौंकन्हय् न्ह्यःने वयाच्वंगु पाहाँचः¥हे, घोडेजात्रा, जनबहाःद्यः सालीगु थेंज्याःगु मौलिक जात्रापर्वत आपालं जनसहभागिता दथुइ तःजिक न्यायेकेगु झीगु परम्परा खः । तर आःया विषम परिस्थितिइ थथे आपालं मनूतय् दथुइ भीडभाड यानाः जात्रापर्व न्यायेकेगु अवस्था झीथाय् मदयाच्वंगुलिं थःगु मौलिक कला, संस्कृति व परम्पराया विधियात यथावत तसें थुगुसी छकः भीडभाड यानाः अज्याःगु जात्रापर्व मन्यायेकेत नं सकल संस्कृतिह्यमिपिंत दुनुगलंनिसें इनाप यानाच्वना ।

उलि जक मखु, थन थीथी धर्म, संस्कृति माने याइपिं समुदाय नं उलि हे दु । देगः, गुम्बा, चैत्य, मस्जिद, चर्च थेंज्याःगु धार्मिकस्थलय् थःगु परम्परा कथं मुनेगु व पुजाआजा यायेगु नं झीगु पुलांगु हे चलन खः । तर धार्मिकस्थलय् अथे भीडभाड जुइबलय् नं ल्वय् न्यना वनीगु सम्भावनायात ध्यानय् तसें धार्मिकस्थलय् भीडभाड यानामदीत नं दुनुगलंनिसें इनाप यानाच्वना । लिसें, सार्वजनिक भ्वय्, पुजाआजा थेंज्याःगु संस्कारजन्य ज्याझ्वःत नं यक्व मनू सःताः मयायेत व अज्याःगु ज्याझ्वलय् ब्वति मकायेत नं इनाप यानाच्वना ।

येँ महानगरपालिकां कोरोना भाइरस पनेया लागिं सूचनामूलक सन्देश डिजिटल बोर्ड, पर्चा, पम्प्लेट नेपाली व नेपालभाषा निगुलिं भासं प्रकाशन यानाः महानगरन्यंकं जनचेतनामूलक अभियान न्ह्याकाच्वंगु दु । उकिं थुज्वःगु सकारात्मक सूचं त्वाःत्वालय् चुक-चुकय् थ्यंकाः ग्वाहालि यानादीत सकसितं इनाप यानाच्वना । येँ महानगर दुनेया फुक्कं वडाय् दुगु विपद् व्यवस्थापन समितियात समेत महानगरपालिकां सक्रिय यानाच्वंगु जूगुलिं अज्याःगु समितिलिसे नं आवश्यक समन्वय यानाः न्ह्याः वनेत अपिल यानाच्वना । थः जःखः सुयातं कोरोना संक्रमणया शंका जूसा येँ महानगरपालिकाया ग्वाहालिइ सञ्चालित एम्बुलेन्स सेवा (१०२) व महानगरया टोल फ्रि नम्बर ११८० स खबर व सुचं बियादीत नं सकसितं इनाप यानाच्वना ।

बिद्या सुन्दर शाक्य
प्रमुख

तिथिः चिल्लागा ११, ने.सं. ११४०
मितिः २०७६/१२/७