टुकुचा करिडोर चायेकेत माग

येँ (रासस)- संघीय राजधानी येँया दथुया ब्वः जुयाः न्ह्यानाःच्वंगु टुकुचा (इच्छुमति) या जवंखवं कोरिडोर निर्माण यायेमाःगु येँ महानगरपालिकाया जनप्रतिनिधितय्सं माग याःगु दु । इच्छुमती सिथय् जवंखवंया प्यंगू÷प्यंगू मिटरया जक कोरिडोर निर्माण यायेफुसां राजधानीया सवारी ‘जाम’ म्हो जुइ धाःगु दु । येँ महानगरपालिका–२ या वडा अध्यक्ष राजेन्द्रकुमार श्रेष्ठं इच्छुमती सिथय्या जवंखवंया प्यंगू÷प्यंगू मिटरया जक करिडोर निर्माण याःसां नं राजधानीया जाम गाक्कं म्हो जुइ धयादीगु दु ।

येँ महानगरपालिकाया २ नं वडाय् इच्छुमतीया थ्यंमथ्यं ६२० मिटर हाकः लानाच्वंगु न्ह्यथँसें वय्कलं खुसिया बहाव क्षेत्र प्यंगू मिटर त्वःताः जवंखवं प्यंगू÷प्यंगू मिटरया सतक दयेकेमाःगु स्थानीयवासीतय् माग दु धयादिल । काठमाडौँ उपत्यका विकास प्राधिकरणं इच्छुमती बहाव क्षेत्र प्यंगू मिटर व जवंखवं प्यंगू÷प्यंगू मिटरया मापदण्ड क्वछिनातःगु दु ।

येँ महानगरपालिका–२, लाजिम्पाटया नील सरस्वतीस्थान लागाय् खुसि सिथय् थ्यंमथ्यं १५० मिटर सतक लानाच्वंगु वडा ज्याकुथिं धाःगु दु । मेगु लागाय् छुं टहरा दुगुलिं उकियात थुनाः सतक चायेकेफइगु वय्कलं धयादिल । ६२० मिटर लागाया खुखांनिसें न्हय्खातक छेँत धाःसा खुसि सिथय्या प्यंगू मिटर मापदण्ड मिचे यानाः निर्माण जूगुलिं उकियात थुनेमाःगु वडाया नायः श्रेष्ठं धयादिल । थ्व लागाया खुसिया मापदण्ड सुनां गुलि मिचे यानातल धयागु तथ्य नं इलय्ब्यलय् सार्वजनिक जुइगु याः ।

येँ महानगरपालिका–२८ वडा शंकरदेव क्याम्पस न्ह्यःनेया थ्यंमथ्यं १०० मिटर लागाया करिडोर नं चायेकूगु दु । वडा नं २८ य् च्वंगु समाज कल्याण परिषद्या जग्गाय् धाःसा आःतक करिडोर निर्माण जुइ मफुनि । वडा नं २८ या फुक्क लागाया करिडोर निर्माण जुइमाः धइगु अनया स्थानीयवासीतय् माग दुगु वडाया नायः भाइराम खड्गीं धयादीगु दु । वडा नं ११ या भद्रकाली प्लाजाय् नं थ्यंमथ्यं १०० मिटर इच्छुमती करिडोर चाइगु जूगु दु । ल्यं दुगु लागाया अप्वः जग्गा सरकारी ज्याकुथिया जूगु वडा नं ११ या नायः हीरालाल तण्डुकारं धयादी । सरकारी ज्याकुथियात थाय् त्वतकाः राजधानीया मध्यभागय् करिडोर दयेकेमाःगु बिचाः थःम्हेसिनं महानगरपालिकाया सभाय् विसं २०४९ निसें हे तयावयाच्वनागु वय्कलं कनादिल ।

खुसि सभ्यता ल्यंकेगु सन्दर्भय् स्पष्ट नीति दुसा राजधानीया दथुया ब्वः जुयाः न्ह्याइगु इच्छुमती तसकं फोहर जूगु धकाः वडाया नायः तण्डुकारं धयादिल । राजधानीया खुसिइ स्वंगू हे तहया सरकार जनाः करिडोर निर्माण यायेफुसा खुसि सफा यायेत नं ग्वाहालि जुइगु विश्वास यक्वसिया दु । बागमती, रुद्रमती (धोबीखोला), विष्णुमती, मनोहरालगायत खुसि सिथय् दयेकातःगु करिडोरं अःपुक यातायात सुविधा बियाच्वंगु दु । करिडोर निर्माण जूगु कारणं खुसिइ फोहर वांछ्वइपिंत ज्वनाः कानुनी कारबाहीया दायराय् हयेफुगु बागमती सफाइ अभियानकर्मी गोविन्द काफ्लें धयादी । इच्छुमतीयात यचुकेया निंतिं नं करिडोर चायेकेमाःगु माग स्वनिगलय् अप्वयावये धुंकल ।

इच्छुमती महानगरपालिकाया वडा नं १, २, ३, ४, ५, २८ व ११ लागा जुयाः न्ह्याइगु खुसि खः । इच्छुमती करिडोर चायेकेत महानगरपालिका हे न्ह्यज्यां वनेमाःगु वडा नं ११ या नायः तण्डुकारं धयादी । करिडोरय् निचाः पांग्राया सवारी व चिचिग्वःगु सवारीयात दुकायेबलय् तब्याःगु लँय् सारी जाम म्हो जुइगु महानगरपालिकाया जनप्रतिनिधितय् धापु दु ।