ने. सं. ११४६ अनलागा त्रयोदशी -

आः चिनियाँ सीमाय् सुरक्षाकर्मी

भारतलिसे विवाद जुयाच्वंगु इलय् चीनपाखे निगरानी

येँ – थौंकन्हय् भारतलिसे सीमा विवाद जुयाच्वंगु इलय् सरकारं चीनया सीमाय् सशस्त्र प्रहरीया चौकी खडा यानाः सीमा सुरक्षा यायेगु निर्णय याःगु दु । सरकारं चीनलिसे सीमा स्वाना च्वंगु प्यंगू थासय् सशस्त्र प्रहरीया चौकी खडा यानाः सीमा सुरक्षा यायेगु तयारी याःगु खः ।

सूत्रतय्सं धाः कथं आः नेपालं चीनलिसे सीमा स्वानाच्वंगु मुस्ताङ, दार्चुला, संखुवासभा व हुम्ला जिल्लाय् छगू छगू यानाः प्यंगू चौकी खडा यायेगु निर्णय याःगु दु । अन छु थासय् चौकी तःसा बांलाइ धकाः आः थाय् मालाच्वंगु खँ सशस्त्र प्रहरीं बलं धाःगु दु । थ्व प्यंगुलिं नाका दुर्गम व उच्च हिमाली लागाय् लाःगु थाय् खः ।

आः थन तइगु चौकीइ सशस्त्र प्रहरीया जवानत झिंनिगुलिं हे महिना च्वने फइगु कथं व्यवस्था याइगु खँ नं धाःगु दु । हिमाली लागाय् च्वंगु नेपाःया छुं नं कथंया चौकीइ नेपाःया सुरक्षाकर्मीत बर्खाया इलय् जक च्वनाः चिकुला जुल कि क्वय् कुहां वयाः च्वनीगु चलन दुगुलिं आः अज्याःगु स्थिति मजुइमा धकाः दछियंकं हे च्वने फइ कथंया व्यवस्था यायेगु तयारी जुयाच्वंगु खँ धाःगु दु ।

थीथी इलय् भारतलिसे जक सीमा समस्या पिहां वइगु जुयाः नेपालं भारतलिसे सीमा स्वाःगु थासय् सशस्त्र प्रहरीया चौकी तयातःगु दुसां चीनपाखे धाःसा आः तक छगू हे चौकी तःगु मदुनि । नेपाः–चीन सिमानाय् नेपाःया सुरक्षाकर्मी दुगु धइगु हे तातोपानी व रसुवागढी नाकाय् जक खः । तर अन नं सीमा सुरक्षाया लागिं थ्व सुरक्षाकर्मी तयातःगु मखु ।

उगु निगुलिं नाकां व्यापारिक कारोवार जुइगु जूगुलिं अन नेपाः सरकारया भन्सार नं तयातःगु दु । नेपाःया सुरक्षाकर्मीत थ्वहे भन्सार सुरक्षाया लागिं जक अन तयातःगु खः ।

रुस नं ‘रणनीतिक’ स्वापूपाखे
चिनियाँ राष्ट्रपति सी चिनफिङं नेपाःलिसे ‘रणनीतिक स्तर’ या साझेदारी यायेगु धकाः सम्झौता याना थकेवं आः तापाक च्वंगु देय् रुसं नं नेपाःलिसे अज्याःगु हे ‘रणनीतिक’ ज्याझ्वःत याना वनेगु प्रस्ताव न्ह्यःने तःगु दु । थौंकन्हय् मस्कोया भ्रमणय् दीम्ह परराष्ट्र मन्त्री प्रदिप ज्ञवालीलिसे रुसी समकक्षी सर्गेइ लाभ्रोभं अज्याःगु इच्छा प्रकट यानादीगु खः ।

नेपाःपाखें रुसी राष्ट्रपति भ्लादिमिर पुटिनयात नेपाः भ्रमणया ब्वनापौ नं लःल्हायेगु ज्या जूगु उगु ज्याझ्वलय् रुसी पक्षं उकियात सकारात्मक रुपं कासें राष्ट्रपति पुटिनया नेपाः भ्रमणया लागिं कुटनीतिक च्यानलं मिति क्वःछीगु जानकारी यानादीगु खः । खँल्हाबल्हाया झ्वलय् रुसी पक्षं नेपाःया सैन्य पक्षय् ग्वाहालि यायेगु इच्छा प्रकट याःगु खँ धाःगु दु ।