बागिश्वरी मा. वि.इ न्हूपिं विद्यार्थीपिंत लसकुस

ख्वप – बागिश्वरी माध्यमिक विद्यालयय् शैक्षिक दँ २०७५ य् भर्ना जूपिं गुंगू तगिंतकया विद्यार्थीपिंत लसकुस नापं सिरपाः वितरण व सांस्कृतिक ज्याझ्वः जुल । विद्यालय व्यवस्थापन समितिया अध्यक्ष रविन्द्र ज्याख्व मूपाहांकथं झायादीगु ज्याझ्वलय् वय्कलं कक्षागत रुपं न्हाप, लिउ व लियांलिउ जुयादीपिं विद्यार्थीपिंत सिरपाः लःल्हानादीगु खः ।

ज्याझ्वलय् नवासें मूपाहां ज्याख्वं व्यवहारमुखी व अभिभावकया मागकथं व सूचना प्रविधिइ आधारित गुणस्तरीय शिक्षा बी फत धाःसा सामुदायिक विद्यालयय् विद्यार्थीया ल्याः अप्वइ धासें ख्वप नगरपालिकां शैक्षिक दँ २०७५ निसें कक्षा १ व ६ लय् स्थानीय पाठ््यक्रम लागू याःगु जानकारी बियादिल ।

लिसें वय्कलं आधारभूत तहय् २०७४ सालय् ख्वप नगरपालिकां परीक्षा संचालन याःगु व उकिया लिच्वः नं सार्वजनिक याये धुंकूगु जानकारी बियादिल । विद्यालयया प्रधानाध्यापक कृष्णप्रसाद धन्छाया सभापतित्वय् जूगु ज्याझ्वय् सहायक प्रधानाध्यापक ज्ञानसागर प्रजापतिं विद्यालयं आतक सरकारया ख्वाः स्वया मच्वँसे थःपिनिगु हे कुतलं विद्यालयया स्तरयात थकायेत सफल जूगु धासें उकिया श्रेय समस्त विद्यार्थी, अभिभावक व शिक्षकयात बियादिल ।

बागिश्वरी कलेजया प्राचार्य धनकुमार श्रेष्ठं विद्यार्थीया अनुशासन लगनशीलता व मेहनतय् हे विद्यार्थीया सफलता खः धयादिल ।
ज्याझ्वलय् शिक्षकपिं बालगोपाल श्रेष्ठ, मंगलेश्वर ध्वजु, रामलक्ष्मी अवाल व विद्यार्थी प्रमिशा पौडेलं न्हूगु शैक्षिक दँया निंतिं विद्यालयय् भर्ना जुयादीपिं न्हूपिं विद्यार्थीयात लसकुस यानादीगु खः । औपचारिक ज्याझ्वः लिपा विद्यालयया विद्यार्थीतय्सं थीथी सांस्कृतिक ज्याझ्वः न्ह्यब्वःगु खः ।