मरुसतः स्वन्तिनिसें दयेकीगु

मनपापाखें मरुसतः दयेकेत न्यागू करोडया चेक लःल्हात

येँ – येँ महानगरपालिकां ऐतिहासिक मरुसतः पुनर्निर्माण यायेगु निंतिं काष्ठमण्डप पुनर्निर्माण समितियात न्यागू करोड तका ध्यबा बिउगु दु । म्हिगः हनुमानध्वाखा दरवार संरक्षण कार्यक्रमं ग्वसाः ग्वःगु पत्रकार सम्मेलनय् मेयर विद्यासुन्दर शाक्यं समितिया अध्यक्ष लिसें प्रदेशसभा सांसद राजेश शाक्ययात ५ करोड तकाया चेक लःल्हानादीगु खः ।

थ्वहे झ्वलय् काष्ठमण्डप पुनर्निर्माण समितिं थ्वहे वइगु स्वन्तिं–निसें मरुसतः दयेकेगु ज्या विधिवत् रुपं न्ह्याकेगु ग्वसाः यानाच्वंगु खँ सीदुगु दु । उकिया लागिं माः सिँ तयार यायेगु लिसें मरुसतलय् जक प्रयोग जुइगु अलग्ग हे अप्पा तकं छीगु ज्या सुरु याकूगु खँ सीदुगु दु ।

मरुसतलय् न्हापा गज्याःगु अप्पा छ्यला तःगु खः आः नं वहे आकार प्रकार जक मखु अज्याःगु हे वस्तु प्रयोग यानाः उलि हे बल्लाःगु प्रकृतिया अप्पा दयेकाच्वनागु व उकियात परीक्षण यानाः जक मरु सतलय् प्रयोग यायेगु खँ पुनर्निर्माण समितिं धाःगु दु ।

मरुसतः दयेकेगु निंतिं स्थानीय वासिन्दा दुथ्याकाः वंगु जेठ २९ गते सांसद शाक्यया नेतृत्वय् पुनर्निर्माण समिति नीस्वंगु खः । समितियात मनपां अबले ५० लाख तका बिउगु खः । उगु ध्यबां सिँ न्यायेगु लिसें पुनर्निर्माणया ज्या जुयाच्वंगु दु । चेक लःल्हायेगु झ्वलय् मेयर शाक्यं मरुसतः दयेकगु निंतिं १८ करोड तका खर्च जुइगु अनमान जुयाच्वंगु खँ कनादिल ।

मरुसतः मनपाया हे खर्चं दयेकेगु व उकिया लागिं सुं नं विदेशीयाके ध्यबा मकायेगु खँ नं वय्कलं कनादिल । मरुसतःया भौतिक रुपं ज्या जुयाच्वंगु खने मदुसां नियमित ज्या धाःसा जुयाच्वंगु खँ कँसें वय्कलं धयादी, ‘भौतिक रुपं मरुसतः दयेकेत जुयाच्वंगु प्रगति आः पियाच्वनागु दु ।’

वय्कलं वइगु असार तकया दुने छतँ थकाये फइगु लक्ष्य तयाः ज्या जुयाच्वंगु खँ न्यनाः थः उत्साहित जुयागु खँ नं कनादिल । मेयर शाक्यं कुमारी छेँ व माजु देगः दयेकेगु निंतिं तयारी जुयाच्वंगु खँ नं कनादिल ।

उगु हे ज्याझ्वलय् न्ववासें येँ २३ वडाया वडाध्यक्ष मचाराजा महर्जनं हनुमानध्वाखा दरवार क्षेत्र प्यंगू वडाय् लाःगु व पुनर्निर्माणया ज्या नं प्यंगू वडा मिले जुयाः यानाच्वनागु खँ कनादिसें उगु लागाय् लाःगु न्हय्स्वंगू योजना मध्ये झिंच्यागू योजना पूवनेधुंकूगु, झिंनिगू योजनाय् ज्या जुयाच्वंगु, खुगू योजना ज्या याये ल्यं दनिगु, न्यागू योजना खरिद प्रक्रियाय् वनेधुंकूगु, न्हय्गू योजना पुरातत्व विभाग लिसे समन्वय जुयाच्वंगु व मेगु झिंखुगू योजनाया लगत अनुमान यायेगु लिसें नक्सा तयार यायेगु ज्या जुयाच्वंगु खँ कनादिल ।