
येँ – थौं नेपालय् नं सुरक्षित इन्टरनेट दिवस न्यायेकाच्वंगु दु । विश्वय् ताःई न्ह्यवंनिसें थ्व दिवस न्यायेका वयाच्वंगु खःसां नेपालय् धाःसा थौं ५ फ्रेबुअरी कुन्हु न्हापांगु ‘सुरक्षित इन्टरनेट दिवस’ न्यायेकाच्वंगु खः ।
इन्टरनेटपाखें ब्वलंकीगु विकृतिया बारे प्रचार प्रसार यानाः बांलाःगु ज्याय् जक थुकियात गय् यानाः प्रयोग याये फइ धइगु बारे चर्चा परिचर्चा यायेत थ्व दिवस न्यायेकेत्यंगु खँ थ्व दिवसया ग्वसाः खलः ‘चाइल्ड सेफ नेट’ या प्रमुख अनिल रघुवंशीं कनादीगु दु । नेपालय् इन्टरनेटपाखें जुइ फुगु थीथी अपराधपाखें मस्तय्त बचे यायेगु ताः तयाः छुं दँ न्ह्यवंनिसें ‘चाइल्ड सेफ नेटं’ ज्या याना वयाच्वंगु दु ।
थौंकन्हय्या डिजिटल विश्वय् इन्टरनेटया प्रयोग याइपिं मनूत धमाधम अप्वयाच्वंगु दु । नेपालय् जक ५६.४१ प्रतिशत मनूत इन्टरनेटया पहुँचय् थ्यनाच्वंगु दु । नेपालय् फेसबुक चले याइपिं मनूतय् ल्याः ९८ लाख थ्यनाच्वंगु दुसा उकी मध्ये ५२ प्रतिशत प्रयोगकर्तात २५ दँ स्वयां क्वय्यापिं खः ।
इन्टरनेटया गलत प्रयोगं यानाः नेपालय् नं साइबर क्राइम अन्तर्गत आपालं अपराधत प्रहरीं दर्ता जुयाच्वंगु दु । प्रहरीयाथाय् वयाच्वंगु अज्याःगु साइबर क्राइमय् अप्वः यानाः मिसा मस्त पीडित जुयाच्वंगु सीदु । उकिं विशेष यानाः मस्तय्त इन्टरनेटपाखें जुइगु अपराधं बचे यायेमाःगु हाथ्या नेपालय् नं वयेधुंकूगु खँ प्रमुख रघुवंशीं कनादीगु दु ।
थ्व दिवसया लसताय् थौं यल पूच्वया लाबिम मलय् छगू विशेष ज्याझ्वः नं जुइत्यंगु दु । उगु ज्याझ्वलय् ब्वति कायेत इन्टरनेटय् रुची दुपिं सकल मस्तय्त इनाप याःगु दु ।
LEAVE YOUR COMMENTS