एनएफपीजेय् वन्तया अध्यक्षताय् न्हूगु नेतृत्व

येँ(नेपालभाषा टाइम्स)- राष्ट्रिय फोटो पत्रकार समूह (एनएफपीजे)या नकतिनि क्वचाःगु २७ क्वःगु साधारणसभा व १३ क्वःगु तःमुँज्यां समूया न्हूगु नेतृत्व ल्यःगु दु । फोटो पत्रकार प्रदीपराज वन्तया अध्यक्षताय् समूहया झिंन्याम्हेसिया न्हूगु ज्यासना पुचः ल्यःगु खः । वय्कः निक्वःगु कार्यकालया निंतिं निर्विरोध जुयादीगु खः ।

न्हूगु ज्यासना पुचलय् लेखबहादुर श्रेष्ठ वरिष्ठ उपाध्यक्ष, चन्द्रकला क्षेत्री मिसा उपाध्यक्ष, सुनिल शर्मा न्हापांम्ह उपाध्यक्ष, नारायण सिलवाल उपाध्यक्षयय् ल्यःगु दु । अथे हे घनश्याम श्रेष्ठ महासचिव, प्रविण कुलुङ सचिव, प्रदीप श्रेष्ठयात कोषाध्यक्ष ल्यःगु दुसा न्हय्म्ह मू दुजलय् सुशीलकुमार श्रेष्ठ, रमिता छुँजु, दीपेन्द्र महर्जन, मुकुन्द कालीकोटे, हरिशसिंह नगाल, अनुप प्रधान व सागर बस्नेतयात ल्यःगु दु ।

थ्व स्वयां न्ह्यः समूहया साधारणसभाय् थीथी फोटो पत्रकारतय्त थीथी सिरपाः लःल्हाःगु खः । ज्याझ्वलय् ‘हरिगोपाल प्रधान फोटो पत्रकारिता सम्मान’ फोटो पत्रकार गणेश विष्टयात, ‘साहसिक फोटो पत्रकारिता सम्मान’ सुजन वज्राचार्ययात, ‘पर्या–पर्यटन फोटोपत्रकारिता सम्मान’ प्रविण श्रेष्ठयात ‘मनोरञ्जन फोटोपत्रकारिता सम्मान’ लेखबहादुर श्रेष्ठयात लःल्हाःगु खः ।

थुकथं हे ‘खेलकुद फोटो पत्रकारिता सम्मान’ सरोज नेपालयात, ‘माधव थापा जोखिमपूर्ण फोटो पत्रकारिता पुरस्कार–२०८१’ रमिता छुँजु व ‘संस्थागत एनएफपिजे प्रेसिडेण्ट अवार्ड २०८१’ घनश्याम श्रेष्ठयात लःल्हाःगु ज्याझ्वलय् ‘उत्कृष्ट जिल्ला शाखा पुरस्कार’ रामेछाप शाखायात लःल्हाःगु खः ।