१ नम्बर प्रदेशय् नं ओली पक्षीय सरकारयात खतरा

येँ – प्रमुख प्रतिपक्षी दल नेकपा (एमाले) विभाजनया लिच्वः थीथी प्रदेश चाःहिलाः आः प्रदेश नं. १ य् नं लाः वंगु दु । ओली पक्षीय एमाले नेतृत्वया सरकार चले जुयाच्वंगु प्रदेश आः थ्वहे छगू जक ल्यं दनि । माधव नेपालं न्हूगु पार्टी दर्ता यायेवं प्रदेश १ या सरकार नं ढले जुइगु सम्भावना प्रवल जुया वःगु खँ धाःगु दु ।

माधव नेपालं गठन याःगु एकीकृत समाजवादीया केन्द्रीय दुजः जुयाः १ नम्बर प्रदेशया स्वम्ह सांसद खुले जुइधुंकूगु दु । थ्व प्रदेशया कुल ९३ सदस्यीय प्रदेश सभाय् एमालेया ५१ म्ह सांसद दु । थ्व ५१ सांसद मध्ये ओली पक्षया २६ व माधव पक्षया २४ म्ह सांसद दुगु अनुमान यानातःगु दु । माधव पक्षया २४ सांसद मध्ये आः तक स्वम्ह तिनि खुले जूगु दु । मेपिं बुलुहुँ खुले जुया वइगु सम्भावना दु । आःया समीकरण कथं यदि माधव पक्षय् च्याम्ह सांसद खुले जुया वन धाःसा वर्तमान मुख्यमन्त्री शेरधन राईया सरकार क्वःदलीगु निश्चित दु ।

माधव नेपालया पार्टीइ एमालेया च्याम्ह स्वयां अप्वः सांसद खुले जुयाः वनीगु सम्भावना स्वयम् मुख्यमन्त्री राईं हे खंकेधुंकूगु खँ सूत्रं धाःगु दु । थज्याःगु अवस्थाय् आः अन नं बागमति प्रदेशया हे मोडल कथं सरकार एमालेया हे ल्हातय् लाका तयेगु रणनीति दयेकेत्यंगु खँ धाःगु दु । यदि शेरधन राईया सरकार क्वःदलीगु निश्चित खने दत धाःसा अन माधव पक्षया सांसद भीम आचार्ययात मुख्यमन्त्री दयेके फइगु खँ धाःगु दु ।

बागमति प्रदेशय् नं ओली पक्षीय मुख्यमन्त्री डोरमणि पौडेलया सरकार क्वःदलीगु सम्भावना खने दयेवं पौडेलं राजीनामा बियाः माधव पक्षया नेता अष्टलक्ष्मी शाक्ययात मुख्यमन्त्री दयेकूगु खः ।

केन्द्रय् प्रधानमन्त्री केपी ओलीया सरकार क्वःदलेवं गण्डकी, लुम्बिनी व बागमति प्रदेशय् ओली पक्षया सरकार क्वःदलेधुंकूगु दु । आः ल्यं दनिगु १ नम्बर प्रदेश छगू जक खः ।