कोरोनां लुम्बिनी र्याली नं प्रभावित
येँ – विश्वय् न्यनावंगु कोरोना भाइरसया कारणं कन्हय् जुइत्यंगु येँ-लुम्बिनी साइकल र्याली नं प्रभावित जूगु दु । ‘नेवाः सभ्यतानिसें शाक्यमुनि सभ्यता तक’ धइगु नारा बियाः जुइत्यंगु उगु ¥यालीइ ब्वति कायेत निसःम्ह राष्ट्रियस्तरया साइकल यात्रीतय्सं नां दर्ता याःगु खःसां नेपालय् नं कोरोना भाइरसया खतरा अप्वल धइगु समाचार पिहां वयेवं नां दर्ता याःपिं प्यब्वय् छब्व मनूतय्सं साइकल र्यालीइ सहभागी मजुइगु सुचं बिउगु खः ।
बुधवाः छगू पत्रकार सम्मेलन यासें र्यालीया संयोजक दिपक राईं निसःम्ह सहभागी मध्ये न्यय्म्हेसिनं सहभागिता रद्द याइगु सम्भावना दुगु खँ कनादिल । कन्हय् शुक्रवाः सुथय् ६ः३० बजे स्वयम्भूया हारती अजिमाथाय् मुनाः अनं साइकल सहित चित्लाङया लँ जुयाः हेटौडा जुकाः लुम्बिनी थ्यंकः वनीगु ज्याझ्वः दु ।
३१० किलोमिटर ताःहाकःगु उगु ¥यालीइ ब्वति काइपिं स्वदेशी व विदेशी साइकल यात्रीत मध्ये भारतीय सीमा सुरक्षा बलया गुलिं सहभागीतय्सं कोरोना व काश्मिरय् खटे जुइमाःगु कारणं ब्वति काये मफइगु जानकारी याना हःगु दु । थ्व ¥यालीइ जवगु ल्हाः मदुपिं साइकल यात्रीत राम अधिकारी व सृजना घिसिङं नं ब्वति कायेत्यंगु दुसा न्हाय्पं मताःम्ह उदयबहादुर श्रेष्ठ व न्ववाये मफुम्ह प्रशान्त पाण्डेपिं नं थुकी दुथ्याइ ।
सन् २०१७ व २०१९ स निक्वः तक येँ-लुम्बिनी साइकल ¥याली यानाः नेवाः सभ्यता व शाक्य सभ्यतायात स्वायेगु अभियानय् लगे जुयाच्वनादीम्ह अभियन्ता बिक्रम पाण्डेकाजीं थ्व ज्याझ्वलं पर्यटन प्रवद्र्धनया ज्याय् ग्वाहालि जुइगु खँ कनादिल । ¥याली फागु पुन्हिकुन्हु लुम्बिनी थ्यंकाः अन ७७.७७ किलोमिटरया साइकल रेस नं याइगु ग्वसाः दु ।
उगु ज्याझ्वः लुम्बिनी विकास कोषया लागिं सद्भावना राजदूत जुयाच्वनादीम्ह बिक्रम पाण्डेकाजीया आह्वानय् जुइगु खँ मनोज नेवाः खड्गीं कनादिल ।
LEAVE YOUR COMMENTS