लाछिमस्यूया ख्वपया धिमे सम्बन्धी सफूया पितब्वज्या

ख्वप(नेपालभाषा टाइम्स)- न्हापांम्ह मिसा धिमे वाद्यवादकया म्हसीका बीत ताःलाःम्ह इन्दिरा लाछिमस्यूया ‘ख्वपया धिमे बाजं छगू म्हसीका व बोल’ नांया सफू पिदंगु दु । वंगु शनिवाः जूगु छगू ज्याझ्वःया दथुइ ख्वप नगरपालिकाया प्रमुख सुनिल प्रजापतिं उगु सफूया पितब्वज्या यानादीगु खः ।

ज्याझ्वलय् नवासें ख्वप नगर प्रमुख प्रजापतिं धिमे बाजंया बोलय् एकरुपता हयेत सफुतिं महत्वपूर्ण योगदान बीगु विश्वास प्वंकादिसें धिमे बाजंया ख्यलय् इन्दिरा लाछिमस्यूया थ्व छगू क्रान्तिकारी पला जूगु विचाः तयादिल । नेपालय् थौंकन्हय् सांस्कृतिक अतिक्रमण अप्वया वनाच्वंगु खँय् चिउताः प्वंकादिसें मौलिक सीप व ज्ञान न्हू पुस्तायात पुस्तान्तरण याना वने फत धाःसा जक ख्वपया कला, संस्कृति नं लिपाथ्यंकं जीवन्त जुयाच्वनी धयादिल ।धिमे वादक लाछिमस्यूयात ख्वपया जनतां आपालं माया मतिना व सम्मान बियाच्वंगु खँ न्ह्यथनादिसें वय्कःयाके दुगु सीप, कला, व ज्ञान शैक्षिक प्रमाणपत्र स्वयां च्वन्ह्याः धयादिल ।

ख्वप नगरपालिका ५ वडा अध्यक्ष योगेन्द्रमान बिजुक्छें सफूया प्रकाशनं धिमे बाजंया सीप न्हू पुस्ताया दथुइ हस्तान्तरण जुइ धासें गुगुं नं खँया अभिलेखीकरण यायेमाःगु आवश्यक दुगु खँय् बः बियादिल । सफूया च्वमि लाछिमस्यूं धिमे बाजंया म्हसीका व बोल सहितया सफू प्रकाशनं ख्वप देशय् थाइगु धिमे बाजनय् एकरुपता वइगु विश्वास प्वंकादिल ।

ज्याझ्वलय् पद्मकन्या क्याम्पसया सह प्राध्यापक न्हुछेबहादुर डंगोल, लाछिमस्यूया अबुलिसें सांस्कृतिक गुरु पंचलाल लाछिमस्यू, मुक्ति संगीत प्रशिक्षण केन्द्रया मुक्तिसुन्दर जधारी, नेपालभाषा संकिपा ख्यःया नांजाम्ह निर्देशक सुरेन्द्र तुलाधर, लक्ष्मीप्रसाद धुकुछु लगायतं नुगःखँ तयादीगु खः ।