क्यानेडियन नेवाः गुथिया समय्बजि ज्याझ्वः

क्यानेडियन नेवाः गुथिं दँय्दसं न्यायेका वयाच्वंगु ‘समय्बजि’ ज्याझ्वः थुगुसी नं जुल । ब्राम्प्टनस्थित चिंगकुजी पार्कय् थुगुसी जूगु समय्बजि ज्याझ्वः नापं थीथी सांस्कृतिक व मनोरञ्जनात्मक ज्याझ्वः नं जूगु खः ।

ब्राम्प्टन नगरपालिकाया सहकार्यय् जूगु ज्याझ्वलय् ब्राम्प्टन नगरया मेयर लिन्डा जेफ्रीं नेवाः समुदायया संस्कृति व परिकार सम्बन्धी जानकारीनापंया सांस्कृतिक ज्याझ्वलय् ब्वति कायेखंगुलिं थः तसकं लय्ताःगु खँ धयादीगु खः । लिसें वय्कलं ब्राम्प्टन नगर नं छगू बहु सांस्कृतिक नगर जूगु धासें थज्याःगु ज्याझ्वःयात प्रवद्र्धन यायेगु निंतिं ग्वाहालि दयाच्वनी धयादिल । ज्याझ्वलय् वार्ड नं. ३ व ४ या रिजनल काउन्सिलर मार्टिन मेडिरोस व वार्ड नं. ७ व ८ या रिजनल काउन्सिलर पाट फोर्टिनं नेवाः समुदायया थुकथंया संस्कृतिं ब्राम्प्टनया सांस्कृतिक विविधताय् थप योगदान बीगु विश्वास प्वंकादिल ।

गुथिया नायः प्रकाश प्रधानं लसकुस यानादीगु ज्याझ्वलय् मू छ्यांजे विमल श्रेष्ठं ज्याझ्वःया महत्व व उद्देश्यया बारे जानकारी बियादिसें थुगुसीया ज्याझ्वःया निंतिं ब्राम्प्न नगरपालिकां विशेष ग्वाहालि याःगु खँ कनादीगु खः ।

ज्याझ्वलय् टोरन्टो विश्वविद्यालयया नेवाः बौद्ध धर्मय् विद्यावारिधी यानाच्वनादीम्ह विद्यार्थी नापं गुथिया थीथी क्रियाकलापय् संलग्न जुया वयाच्वनादीम्ह इयान टर्नरं नेवाः संस्कृति मौलिक जूगु व तःमिगु संस्कृतिया जाति जूगुलिं हे थम्हं उगु विषय अध्ययन यानागु खँ कनादीगु खः । नेवाः भासं हे थःगु संबोधन यानादीम्ह टर्नरं सहभागिलिसें अन्तरक्रिया नं यानादीगु खः ।

धिमे बाजनं ज्याझ्वलय् उपस्थित जूपिंत लसकुस यायेगु ज्या जूगु खःसा ज्याझ्वलय् चचा प्याखं नापं थीथी सांस्कृतिक हुलाप्याखं नं न्ह्यब्वःगु खः । ज्याझ्वलय् न्ह्यब्वःगु चचा प्याखंया निर्देशन बौद्ध धर्मय् विद्यावारिधी यानाच्वनादीम्ह क्यानेडियन मिसा आम्बर मूरं व धिमे प्याखंया निर्देशन गुथिया दुजः इन्दिरा खड्का श्रेष्ठं यानादीगु खः ।

समय्बजि ज्याझ्वः लिपा निगूगु चरणय् स्थानीय रवि बस्नेतं लाखे प्याखं न्ह्यब्वयादीगु खःसा नेपाःया लोक संस्कृति व संगीतया प्रवद्र्धनया निंतिं क्रियाशील ‘हिमाल भाइब्सं’ राजमति लगायतया लोक धुन न्ह्यब्वःगु खः ।

ज्याझ्वलय् नेपालं हे लोप जुइधुंकूगु ‘कसिमला पाँय्चा’ कासा नं म्हितकूगु खःसा धिमेया तालय् प्याखं हुलेगु धिम्बा प्याखं नं न्ह्यब्वःगु खः । गुथिया अध्यक्ष प्रधान व उपाध्यक्ष माकजुं थीथीकथं ग्वाहालि यानादीपिंत मतिनाया चिं लःल्हानादीगु ज्याझ्वःया संयोजन सुमन राजवंशीं यानादीगु खःसा उपस्थित सकसिगुं निंतिं ‘टग अफ वार’, ‘स्पून रेस, ‘पिनाडा’ व बिंगो नं म्हितकूगु खः ।

सम्बन्धित बुखँ

LEAVE YOUR COMMENTS