ब्याहा लिपा बाःर्हाः तल
जिगु जन्म येँया तंगालय् जूगु खः । अबलय् अन छचाःलं बुँया बुँ । छेँ आपाः मदु। सुपौया छेँ जक । सतः व द्यः छेँ दु। असंया साय्मितय् दिगुद्यः छेँ नं दु। ९० सालया भुखाय् ब्वःबलय् जिमि बाः चुरोट न्याः वनागु हँ ! अबलय् भुखाय् ब्वल हँ ! ब्वाँय् ब्वाँय् छेँपाखे वया हँ ! जिमि ततायात सतःया न्ह्यःने च्वंगु सिमां ल्हात लिपा सकलें जानाः उद्धार यात धयादीगु। अबलय् जिमि बाः नीदँ दत हँ ! जिमि नं सुपौया नितँजाःगु छेँ । भुखाचं जिमि छेँ पाःताः जुइक दुन। छेँ मदयेवं जिपिं साय्मितय्गु फल्चाय् च्वं वना । जिपिं द्यःपाः नं च्वना । द्यःयाथाय् ध्यबा छाइपिं आपाः मदु। धिब्छगः दां छातकि तःधं ताइगु। आपाः यानाः समय्, भ्वय् ब्व हे छाये हइगु।
जिमि मां गुरुङनी । बाःया दरवारय् ज्या । अन ब्याण्डबाजा थाइगु। पल्टन जागिर धाइ । मांया दरवारय् सुसारे ज्या । अनं हे बाःनं मांयात हःगु धाइ । पाजु नं नारांहितिइ पुलिस । बाः नं मांयात हयेवं बाःयात ज्वना यंकल हँ ! अन कुना तल हँ ! लिपा बाःयात त्वःतल । मांयात ध्यबा बियाः ज्यां लिकया हल हँ ! जिमि बाज्या (मांया बाः) गांया पञ्च । बाःनाप वयेधुंकाः मां छक्वः निक्वः गामय् वं । जितः नं छक्वः ब्वना यंकूगु दु। तर गन धकाः मसिउ।
जि नं बाःनाप दरवारय् वना । तप्यंक दुहां वनेगु। तप्यंक पिहां वयेगु। गनं थीकी मखु। ब्वःताय् घ्यः तुलुतुलु वयेक जा जायेक तयाबी । इमिसं ब्वःगु ज्या जक यायेगु। तं चाये मजिउ। जिमि किजा छम्ह नं दु। न्हापाया ई ल्वचं कलकि वासः नकेमाः धइगु मसिउ। किजा गलय् जुया वन। छु जू छु जू धया जुल । न्हियान्हिथं गंसि जुजुं वन। उकिं हे किजा मंत ।
जि च्यादँ फुत। अबलय् जिमि छेँय् दराभतझल । सु धकाः जिं म्हमसिउ। जिमि पासापिं सकलें बःमनीत। इपिं जि स्वयां चलाख । इमिसं जितः धाल, ‘अब तिमीलाई दुलही बनाएर लग्छ ।’ धयाः इमि छेँय् सुचुके यंकल । जिमि मां गुरुङनी जूगुलिं जूगुलिं नेवाः भाय् मल्हाना । पासापिं नं सकलें बःमनी । उकिं खय्भासं हे खँल्हाबल्हा यायेगु। जि च्यादँ फुइवं येँया दलाछिइ बियाहल । दराभतं जितः लँधुछिं बुया हल । गन यंकेत्यंगु छुं मसिउ। थम्हं लँ नं म्हमसिउ। सुनसान लँपु। छम्ह निम्ह लँय् जूपिं दु। तिनिख्यलय् थ्यनेवं झिलिमिलि मत खनेदत। अन थ्यनेवं जितः दिकल । जितः जरी दुगु लाकां न्ह्याकातःगु। अन थ्यंबलय् जिगु छपा लाकां मदु। उखेंथुखें स्वल । लुइके मफुत। अनंलि छेँय् दुत हल ।
न्हूगु छेँ जक मखु। जिगु लागिं भाय् नं न्हूगु। खय् भाय् जक ल्हाइम्ह जि । अन च्वंपिं सकसिनं खय् भाय् मसः । माजुं ला झन छतिं मसः । जि माजुनाप च्वनेमाःम्ह। जिं धाःगु माजुं मथू । माजुं धाःगु जिं मथू । थनयापिं सकलें नेवाः खँ ल्हाइपिं । गनं वनेबलय् थी मत्यः धाइगु। ‘थी मजिउ, थी मत्यः’ धाःगु तकं मथू ।
जि कान्छिम्ह भौमचा । ज्या दक्व तताःजुपिंसं याइगु। भाराचिप सिलेगु ज्या जक जिं यायेगु। अबलय् कसिइ जा थुइगु। माजुं जितः कसि सिलेगु ज्या बिल । जिं कसि तज्याये यः धइगु मसिउ। सिलेत ज्वनाः बँय् तयेवं तज्यात। कसि तज्यायेवं जि ग्यात। माजुं छुं मधाः । अनंलिपा तिनि जिं होस तयाः ज्या याना ।
ब्याहा लिपा केहेंभतनाप जितः नं बाःर्हाः तल । केहेंभतयात झिनिन्हु कुत। जितः छन्हु कुन। जितः बाःर्हाः तःबलय् मांया प्वाथय् दु। प्वाथय् दुम्ह मांयात बाःर्हाः ख्याः तयेकल । गुलिसिनं प्वाथय् दुम्हं बाःर्हाःख्याः तये मजिउ धालं माजु माने मजू । माजुं मांयात हे बाःर्हाःख्याः तयेकेबिल । बहनि खुताः इलंनिसें मांया हि कुहां वल । केहें छम्ह बुइकाः मां मंत। केहें नं लत्याति म्वात। अनंलि मंत ।
छेँय् जितः सकसिनं माया याः । ब्याहा याना वयेधुंकाः नं त्वालय् म्हितः जुया । छुं दँ लिपा छेँज्या नं सयेका यंका । छेँय् सकसिनं सुइकाः ज्या याइगु। पाइन्ट, कोट, ब्लाउज सकतां सुइगु। अबलय् ल्हाःया मेसिन। जिं नं लं सुया । अबलय् आपाः यानाः घाँघर सुइपिं दु। मोहनि व पाहांचःर्हेया इलय् वसः सुइकः वइपिं आपाः दु। लं सुइगु इलय् ज्याला नं म्हो । ब्लाउज छपाःया न्यासुका ज्याला । कमिजया न्हय्म्वः, स्वर्का थ्यंबलय् तसकं थिके धाल । वसः सुयाः इस्त्री तयेमाल । उकिं ग्वारा कसःरीइ ह्यंग्वाः तयाः क्वाकेगु। उकिं इस्त्री तयेगु ।
उगु ई न्हिं खानाः न्हिं नयेमाःगु। माजु न्हिंन्हिं पसः वनी । न्हियात माःगु सामान न्हियान्हिथं न्याना हइगु। छम्वःया झिकले सिँ बिउ। छमना जाकिया छम्वः तू । जिं ज्या यानाः भचा भचा ध्येबा मुनेगु याना । जिं छसुका, छम्वः यायां आशाकाजी तःबाःयात बीगु। जिगु ध्यबा तःबाःनं मुना तइ । न्यय्तका दां दयेवं दयेवं जितः लुँ न्याना बी । थथे यानाः जिं लुँ न्याना तया । लिपा दराभतं छेँ दने माल धाल । जिं थःके दुगु लुँ बिया । छेँ दनेत ग्वाहालि जुल ।
दराभतं जितः तसकं माया याः । थःछेँय् वने त्यलकि सँ छ्यंकी । नापं ल्हाः ज्वनाः छेँय् तक तये यंकी । दराभतं हे जिं यार्लिब नं दयेकाबिल । छन्हु जि थः हे वने सल जुइ धकाः याकःचा छ्वया बिउगु। जि ला गन लात गन। धाये हे मफु । लिपा जितः माःमाः जुइ माल ।
छन्हु जि छेँय् नं लिहां वयाच्वनागु। लँपु झिझांमिझां दं । लाजिम्पाटपाखे तमागु वंगलसिमा दु। बहनि खिउँसे च्वनेधुंकल । उगु सिमापाखे भकुंग्वारा छगः छक्वः उखे छक्वः थुखे थ्वानाच्वन। मनू खनेमदु। भकुंग्वारा जक उखेंथुखें वनाच्वन। जि तसकं ग्यात। ग्याग्यां छेँय् थ्यंका । छेँय् थ्यनेवं खँ कना । सकसिनं भकुंग्वारा ख्याः वःगु धाल । जिमि मिजं आखः सः । उकिं समझदार जू । जितः नं आखः ब्वंकेत स्वःगु खः । जिं आखः ब्वंगु खनेवं माजुं ब्वःबिल । आखः ब्वनेगु ज्वलं वांछ्वया बिल । ‘छु बेश्या जुइत आखः ब्वनेगु ला?’ धकाः ब्वःबिल । अनंलिपा मब्वना । लिपा ला छेँज्यां हे थिक्क जुल । न्हापा जात्रा वल कि तसकं न्ह्यइपुसे च्वं । जि घोडाजात्रा जुल कि सिमाय् गयाः स्वःवनेगु। छन्हु जि सिमां कुतुंवल, अनंलिपा जात्रा स्वःवनेगु हे त्वःता ।
न्ह्यब्वःम्ह : सुनिता मानन्धर
LEAVE YOUR COMMENTS