जकःमिया मचा चिनाखँ ब्वनेज्या व सहलह

येँ – नेवाः देय् दबूया भाषा, साहित्य व संस्कृति कवः, नेवाः स्यनामि दबू व नेवाः बस्ती नेवाः स्कुल अभियानया मंकाः ग्वसालय् वंगु शनिवाः लोककवि राजभाई जकःमिया मचा चिनाखँ ब्वनेज्या व सहलह ज्याझ्वः जुल ।थनया जगतसुन्दर ब्वनेकुथिइ जूगु ज्याझ्वःया उलेज्या मूपाहां जनकवि दुर्गालाल श्रेष्ठं त्वाःदेवाय् मत च्याकाः यानादीगु खः ।

ज्याझ्वलय् विशेष पाहाकथं देय् दबूया नायः नरेश ताम्राकार, ब्वनेकुथिया प्रिन्सिपल सुनिता मानन्धर, नेवाः बस्ती नेवाः स्कुल अभियानया नवीन थेच्वमि, नेवाः स्यनामि दबूया कायबहादुर नेपाली ब्यञ्जनकार, साहित्यकार मोहन दुवाल लगायतपिं झायादीगु खः । ज्याझ्वलय् कवि जकःमिं थीथी मचा चिनाखँ ब्वनाः न्यंकादीगु खःसा उकियात कयाः सहलह नं याःगु खः । ज्याझ्वलय् थीथी व्यक्तित्वपिंसं थःथःगु नुगःखँ तयादीगु खः ।