मिसा साहित्यकारपिनि साहित्यिक ज्याझ्वः

येँ(नेपालभाषा टाइम्स)- नेवाः मिसा साहित्यकारपिनिगु संस्था मिसा साहित्यकार मुनाया ग्वसालय् वंगु शनिवाः वाङ्मय शताब्दी पुरुष मदुम्ह सत्यमोहन जोशीयात लुमंकाः छगू साहित्यिक ज्याझ्वः जुल । ‘सत्यमोहन जोशी लुमंकाः’ नामं जूगु उगु ज्याझ्वः लोक साहित्य परिषद्या भवनय् जूगु खः ।

संस्थाया नायः अञ्जना ताम्राकारया सभापतित्वय् मदुम्ह शताब्दीपुरुष जोशीया लुमन्तिइ छगू मिनेट मौन धारण यासें न्ह्याःगु ज्याझ्वलय् मूपाहांकथं झायादीम्ह नेपालभाषा केन्द्रीय विभागया पुलांम्ह प्रमुख नापं भाषाविद् प्रा. डा. सुन्दरकृष्ण जोशी त्वाःदेवाय् मत च्याकाः ज्याझ्वःया उलेज्या यानादीगु खः । ज्याझ्वलय् आपालं न्हूपिं पुलांपिं साहित्यकारपिंसं थःथःगु रचना पाठ यानादीगु खः ।

ज्याझ्वलय् नांजाःम्ह कवयित्री प्रतिसरा सायमि, दिव्या ताम्राकार, विमलप्रभा वज्राचार्य, रामेश्वर मिश्रण श्रेष्ठ, बद्री वेदना, सुरेश प्रधान, मिनर्भा शर्मा राजोपाध्याय, रेणु श्रेष्ठ, अमिरमैयाँ रंजित, रीता महर्जन, मिना वज्राचार्य, मिलन शाक्य लगायतं थःथःगु रचना पाठ यानादीगु खः ।

ज्याझ्वलय् विशेष पाहांकथं झायादीम्ह लुम्बिनी बौद्ध विश्वविद्यालयया डीन प्रा. डा. माणिकरत्न शाक्यं शताब्दी पुरुष जोशीया व्यक्तित्वयात कयाः नुगःखँ तयादीगु ख ः ।

उगु इलय् मूपाहां प्रा. डा. जोशीलिसें लोक साहित्य परिषद्या नायः राजितबहादुर श्रेष्ठ, कवयित्री प्रतिसरा साय्मि, लोककवि राजभाई जकःमिं मदुम्ह वाङ्मय शताब्दी पुरुष जोशीया योगदान व वय्कःया व्यक्तित्वयात कयाः नुगःखँ तयादीगु खः ।

संस्थाया न्वकु दिव्या ताम्राकारं लसकुस यानादीगु ज्याझ्वलय् समालोचक प्रा. पे्रमशान्ति तुलाधरं छ्वया हयादीगु भिंतुना सन्देश रेणु श्रेष्ठं ब्वनाः न्यंकादीगु खः ।

संस्थाया मेम्ह न्वकु विमलप्रभा वज्राचार्यं सुभाय् देछानादीगु ज्याझ्वलय् रचना पाठ यानादीपिं साहित्यकारपिंत सुभाय् पौ नं लःल्हाःगु खः ।