कोरोना संक्रमण अप्वयावगुलिं दिल्लीइ रात्रकालीन कफ्र्यु

एजेन्सी- भारतया राजधानी न्हू दिल्लीइ कोरोना संक्रमण अप्वयागुलिं राज्य सरकारं सोमवाः निसें रात्रिकालीन कफ्र्युया घोषणा याःगु दु । बिबिसीं बिउगु जानकारीकथं दिल्ली सरकारं बहनी ११ ताःनिसें सुथसिया ५ ताः तक कफ्र्यु तःगु दु ।

भारतीय सञ्चार माध्यमतय्सं बिउगु जानकारीकथं न्हूदँ २०२२ न्यायेकेत जुइगु ज्याझ्वलं यानाः कोरोना संक्रमण अप्वयेफुगु व न्हूगु भेरियन्ट ओमिक्रोनया संक्रमितत नं अप्वया वःगुलिं दिल्ली सरकारं थ्व निर्णय याःगु खः । भारतय् सोमवाः तक ५७८ म्हेसिके ओमिक्रोन खनेदयेधुंकूगु दुसा दकलय् अप्वः दिल्लीइ जक १४२ म्हेसिके ओमिक्रोन खनेदुगु दु ।

भारतया राजधानी दिल्लीलिसें मेगु खुगू राज्यय् नं रात्रिकालीन कफ्र्यु तःगु दु । दिल्ली, उत्तर प्रदेश, महाराष्ट्र, हरियाणा, गुजरात, मध्य प्रदेश व कर्नाटकय् रात्रिकालीन कफ्र्यु तःगु खः ।