यँयाःया लसताय् महाद्यः पार्वती दबुलिइ सांस्कृतिक ज्याझ्वः
येँ(नेपालभाषा टाइम्स)÷ छगू अध्ययनकथं येँ महानगरपालिका लागा दुने पीन्हय्गू दबू दु । थुपिं दबूमध्ये गुलिं अस्तित्वय् दुसा गुलिं लोपोन्मुख अवस्थाय् थ्यनेधुंकूगु दु । प्रारम्भिक अध्ययनकथं महानगर दुने दुगु पीन्हय्गू दबूमध्ये २७ गू दुरुस्त अवस्थाय् दु । झिंप्यंगू दबू मर्मत यानाः संचालन याये फइगु अवस्थाय् दुसा निगू दुना वनेधुंकूगु व प्यंगू दबू तने धुंकूगु वा अस्तित्वय् मदयेधुंकूगु दु ।
त्वाः त्वालय् दुगु थज्याःगु दबुलिइ गुगुं इलय् नेपालभाषाया आपालं सांगीतिक व साहित्यिक ज्याझ्वः जुइगु याना वयाच्वंगु खःसा ईलिसें वःगु हिउपाःया नापनापं अज्याःगु ज्याझ्वः नं मजुया वल । लिपांगु इलय् येँ महानगरपालिकां दबू पुनःस्थापना (डबली रिभाइभ) ज्याझ्वःयात प्राथमिकता बियाः थीथी ज्याझ्वः यायेगु याना वयाच्वंगु दु ।
थ्व हे झ्वलय् येँ महानगरपालिकां यँयाः नखःया लसताय् लाकाः येँया महाद्यः पार्वती दबुलिइ छगू विशेष व तःजिगु सांस्कृतिक ज्याझ्वः याःगु दु । यँयाः शुरु जूगु दिं यंलाथ्व द्वादशिकुन्हु लोकल्स काठमाडौं लिसेया सहकार्यय् उगु ज्याझ्वः याःगु खः । ज्याझ्वलय् धिमे बाजं, धिमे प्याखं, धाःबाजंया ब्वज्या याःगु खः । अथे हे ज्याझ्वलय् नेपाली सेना व शार्दुल जंग गुल्म (गुरुजुया पल्टन)पाखें नं सांगीतिक ज्याझ्वः न्ह्यब्वःगु खः ।
ज्याझ्वःया उलेज्या य ानादिसें येँ महानगरपालिकाया उपप्रमुख सुनिता डंगोलं जात्रा, पर्व, संचालन जुइगु थाय् व विधिलिसें संचालन याइगु समुदाय, थ्वलिसे सम्बन्धित नसात्वँसा, रीतिथिति, परम्परा, गायन, वाद्यवादन, हुलाप्याखं, श्रृंगार आदि ल्यंकेगु व पुस्तान्तरण यायेगु जिम्मेवारीयात प्राथमिकता बिया वयाच्वनागु खँ कनादिल ।
दबू धइगु छगू खुल्ला व चकंगु थाय् खः । थज्याःगु संरचना अप्वः धइथें निकालँ, प्यकालँ, चुक, ननि, लाछि, देवस्थल, तीर्थस्थल व मेमेगु धार्मिक व सांस्कृतिक ज्याझ्वः जुइगु थासय् दयेकातःगु दइ । दबू निर्माणया मुख्य उद्देश्य धइगु हे सांस्कृतिक व साहित्यिक ज्याझ्वः यायेगु खः । सामाजिक, सांस्कृतिक गतिविधि, क्रियाकलाप, नाटक, ख्यालः, म्येँ, हुलाप्याखं लगायतया ज्याझ्वः यायेगु ल्याखं झी पुर्खातय्सं उकियात छ्यलेगु याना वयाच्वंगु खः । घौपलख व छझाः न्ह्यइपुकेया निंतिं वा छगू निश्चित ईया निंतिं मखसे थः सन्तानं नं उकियात उकथं हे प्रयोग याये फयेमा धइगु ल्याखं स्थायी व स्थापित संरचनाया रुपय् दबू दयेकाः झीत लःल्हाना थकूगु व थौंकन्हय् अज्याःगु दबू गुगु उद्देश्यं दयेकाथकूगु व उकिया निंतिं प्रयोजन मजुयाच्वंगु जक मखु लोप जुया वनीगु अवस्थाय् थ्यंगु उपप्रमुख डंगोलया धापू दु ।
सम्पदा तथा पर्यटन समितिया संयोजक लिसें ८ वडाअध्यक्ष आशामान संगतं गन गुकथं गज्याःगु संस्कार न्ह्याइ, अन उकथं हे चले याकेबीमाः धयादिल । सुनां संचालन याइ, इमिसं गथे संचालन याइ व हे कथंया वातावरण मिले याना वनेमाःगु वय्कःया धापू दु । सम्पदा तथा पर्यटन महाशाखा प्रमुख श्रृजु प्रधानं दबूया संरचना नेपालमण्डलया म्हसीकालिसे स्वानाच्वंगु धासें थुकिया पुनरुत्थानया निंतिं नियमित रुपं ज्याझ्वः यायेगु लक्ष्यकथं न्ह्याः वनाच्वनागु खँ कनादिल ।
LEAVE YOUR COMMENTS