ने. सं. ११४४ कौलाथ्व सप्तमी - फूलपाती

क्यानाडाय् यँयाः पुन्हि व समय्बजि ज्याझ्वः

येँ(नेपालभाषा टाइम्स)- क्यानेडियन नेवाः गुथिया ग्वसालय् दँय्दसं थें थुगुसीया नं यँयाःपुन्हिया ज्याझ्वः याःगु दु । ब्राम्प्टन सहरय् च्वंगु चिन्गुकुजि पार्कय् यँयाःपुन्हिलिसें समय्बजि ज्याझ्वः जूगु खः । ज्याझ्वलय् मूपाहांकथं झायादीम्ह ब्राम्प्टन सहरया मेयर प्याट्रिक ब्राउनं परम्परागत रुपय् तयातःगु ‘समयबजि’या ब्वयात उलाः ज्याझ्वःया उलेज्या यानादीगु खः । ज्याझ्वलय् नवासें ब्राम्प्टन सरहया मेयर ब्राउनं नेपाःया नेवाः समुदायं क्यानेडियन नेवाः गुथि नीस्वनाः नगरया बहुसांस्कृतिक विविधतायात अझ बांलाकेगु निंतिं योगदान बिया वयाच्वंगु धारणा तयादीगु खः । लिसें वय्कलं नेपाःमि समुदायया सक्रियाताय् सगरमाथा उद्यानया व्यवस्थापन यायेगु ज्या नं बांलाक हे जूगु विचाः तयादीगु खः ।

गुथिया निम्हम्ह न्वकुलिसें ज्याझ्वःया कजि सुरेन्द्रलाल श्रेष्ठं लसकुस यानादिसें नेवाः कला, संस्कृति संरक्षण व संवद्र्धनया निंतिं गुथिं थीथी ज्याझ्वः याना वयाच्वंगु जानकारी बियादिल । लिसें वय्कलं थुगुसी नेवाः संस्कृतिया थप ज्याझ् नं जूगु खँ कनादीगु खः ।

यँयाः जात्राया जानकारी बियादिसें गुथिया न्हापांम्ह न्वकु विमलमान श्रेष्ठं थःगु देय् त्वःता वःसां नेवाः कला, संस्कृति, नखःचखः जात्रा, पर्वया संरक्षण, संवद्र्धनलिसें न्हू पुस्तायात नं उकिया जानकारी बीगु ल्याखं गुथिं स्थापनकालनिसें थीथी रचनात्मक ज्याझ्वः याना वयाच्वनागु खँ कनादिल ।

नेवाः बौद्ध धर्मया विषयय् विद्यावारिधी (पीएचडी) यानाच्वनादीम्ह इयान टर्नरं नेवाः समुदायया नखःचखः, जात्रा, पर्व व थीथी संस्कारय् दइगु नसात्वँसा ज्वलं तसकं स्वादिष्ट, स्वास्थ्यवद्र्धक व विज्ञान सम्मन जूगुलिं थःत तसकं यःगु खँ कनादिल । गुथि अन्तर्गतया ल्याय्म्ह पुचःया आयुश्ना श्रेष्ठं व प्रतीक प्रधानं नेवाः संस्कृतियात ल्याय्म्ह पुस्ताया दथुइ म्हसीका बीगु व पुस्तान्तरण याना यंकेगु उद्देश्यं संचालन याना वयाच्वंगु ‘नेक्स्ट जेनेरेसन’ ज्याझ्वः बारे जानकारी बियादीगु खः ।

ज्याझ्वलउ् प्रा. डा. टम ओ’नीलं गुथि व ब्रोक विश्वविद्यालयया मंकाः ग्वसालय् नेपाःमि आप्रवासीया विषयय् जूगु अनुसन्धानयात कयाः नुगःखँ तयादीगु खः । गुथिया नायः उत्तम माकजुं नेवाः संस्कृति प्रवद्र्धन यायेगु ल्याखं जुइगु थुकथंया ज्याझ्वलय् निरन्तर रुपं ल्याय्म्ह पुस्ताया सहभागिता, संलग्नता आवश्यक जूगु खँ कुलादिल ।

नेपाः, क्यानाडा व नेवाः राष्ट्रिय म्येँ हायेकाः कुमारि पुजा यानाः न्ह्याकूगु ज्याझ्वलय् धिमे बाजनय् लाखे, पुलुकिसि प्याखं नं न्ह्यब्वःगु खः । ज्याझ्वलय् रञ्जना सैंजू लगायतया पुचलं सितारय् मंगलधुन न्ह्यब्वयादीगु खःसा ‘नेवाः तथा संस्कृत मणीशील महाअवदान’य् पीएचडी यानादीम्ह डा. अम्बर लेभान्डर वज्रयोगिनि प्याखं व वय्कःपाखें प्रशिक्षित जुयादीपिं प्रशिक्षार्थीपिंसं चचा प्याखं न्ह्यब्वयादीगु खः ।
ज्याझ्वलय् मिसा पुचःयापाखें अरुणा प्रधान, यशोदा श्रेष्ठ, गायत्रि कायष्ठ, सबिना शाक्य, नीलम श्रेष्ठ, मनिषा पाण्डे व सुजिता मल्लं हुलाप्याखं न्ह्यब्वयादीगु खः । अथे हे ज्याझ्वलय् नेवाः सम्पदा विषययात कःघानाः न्ह्यसः लिसः कासा नं याःगु खःसा क्वाःकासा, हांलिना मां लिना कासालिसें सांगीतिक ज्याझ्वः नं न्ह्यब्वःगु खः । गुथि व ब्राम्प्टन सहरया मंकाः ग्वसालय् जूगु ज्याझ्वलय् प्यसःत्या स्वयां अप्वः मनूतय् सहभागिता दुगु खः ।