‘स्वनिगःया स्वबासीया समस्या समाधान जुइ’
येँ(नेपालभाषा टाइम्स)÷ भूमि व्यवस्था, सहकारी तथा गरिबी निवारण मन्त्री रन्जिता श्रेष्ठं स्वनिगः दुनेया स्वबासीतय् समस्या याकनं समाधान यायेगु जुइ धयादीगु दु । मन्त्री श्रेष्ठं थःगु हे कार्यकालय् भूमि सम्बन्धिया समस्या समाधान यायेगु जुइ धकाः धयादीगु खः ।
उपत्यकावासी व्यवस्थापन तथा संघर्ष समितिं स्वबासी व बेनिस्सा छेँबुँया दर्ता खुल्ला यायेमाःगु माग यासें मन्त्री श्रेष्ठयात ध्यानकार्षण यायेत वंगु इलय् मन्त्री श्रेष्ठं उकथंया आश्वासन बियादीगु खः ।
मन्त्री श्रेष्ठं उगु इलय् थौंकन्हय् थः मन्त्रिपरिषद्या सदस्य नं जुयाच्वनागु व छिकिपिनिगु समस्या बारे नं बांलाक थूम्ह व्यक्ति खः धासें द्वलंद्वः दँ न्ह्यःनिसें थःगु हे थातथलोय् च्वना वयाच्वंपिं स्वबासी व जग्गाया निस्सा मदुपिं स्थानीययात लालपूर्जा उपलब्ध याकेगु निंतिं नं थम्हं सहजीकरण यायेगु जुइ धयादिल ।
संघर्ष समितिया संयोजक पृथविन्दु महर्जनया नेतृत्वय् वंगु पुचःलिसे जूगु खँल्हाबल्हाया इलय् मन्त्री श्रेष्ठं थः न्ह्याबलें पीडित स्वबासीतय् पक्षय् दु धयादिल । पीडित पक्षं थ्व स्वयां न्ह्यः फिब्व ख्यलय् धर्ना नं बिउगु खः ।
२०७२ सालय् जारी जूगु नेपाःया संविधानं देय्या सकल नागरिकया सम्पत्तिया हक प्रत्यायोजन याःगु जूसां नं संविधानय् न्ह्यथनातःकथंया अधिकार प्राप्त मजूगु स्थानीयवासीया धापू दु ।
LEAVE YOUR COMMENTS